Астана. 29 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Алматы қаласының әкімі Дархан Сатыбалдының қаланың әлеуметтік-экономикалық дамуы және негізгі қала құрылысы мен инфрақұрылымдық жобаларды іске асыру барысы туралы есебін тыңдады. Бұл туралы мемлекет басшысының баспасөз қызметі хабарлады.
Бейсенбі күні таратылған ақпаратта айтылғандай, Сатыбалды 2025 жылдың қорытындысы бойынша қысқа мерзімді экономикалық индикатор 12,8%-ға дейін жеделдегенін мәлімдеді. Мемлекеттік бюджетке 6,6 трлн теңге көлемінде салықтар мен міндетті төлемдер түскен.
Қала әкімі сондай-ақ қаланы полицентрлік дамытуға бағытталған жаңа стратегиялық бастамаларды таныстырды. Бұл тұжырымдама аясында заманауи IT-инфрақұрылым, көпфункциялы іскерлік кешендер, демалыс орындары мен абаттандырылған рекреациялық аймақтар сияқты жаңа тартылыс нүктелерін құру көзделген.
Сонымен қатар Сатыбалды Алматының заманауи көлік қаңқасын қалыптастыру барысы жөнінде ақпарат берді.
«Халықтың мобильдігін арттыру мен қалалық ортаның орнықты дамуының негізгі факторы жылдам қоғамдық көлік жүйелерін дамыту болады», – делінген хабарламада.
Бұдан бөлек, Алматының бас жоспары ауаның еркін айналымын қамтамасыз етуге, қаланың жоғарғы және орталық бөліктеріндегі шамадан тыс тығыздықты тежеуге, сондай-ақ жасыл аймақтардың аумағын үш есеге ұлғайтып, 3 800 гектарға дейін жеткізуге бағытталған қала құрылысы шешімдерін қамтиды. Қоғамдық кеңістіктерді безендірудің бірыңғай стандарттары негізінде абаттандыру, көгалдандыру, саябақтар мен көшелерді қайта жаңғырту жөніндегі кешенді шаралар қарастырылған.
Сондай-ақ Сатыбалды Алматы тау кластері жобасының дайындық барысы туралы баяндады. Қазіргі уақытта Шымбұлақ пен Ой-Қарағай демалыс орындарында Медеу базалық станциясы арқылы біріктіруді көздейтін техникалық-экономикалық негіздемені әзірлеу аяқталуға жақын.
«Жобаны іске асыру нәтижесінде аспалы жолдардың саны 16-дан 62-ге дейін артады, тау шаңғысы трассаларының ұзындығы 250 шақырымнан асады, ал олардың өткізу қабілеті тәулігіне 40 мың адамға дейін жеткізіледі», – деп көрсетілген хабарламада.
Есепті тыңдағаннан кейін Қасым-Жомарт Тоқаев Алматы экономикасын одан әрі әртараптандыру, экологиялық жағдайды жақсарту, орнықты көлік және туристік инфрақұрылымды қалыптастыру, сондай-ақ қалалық ортаның сапасы мен тұрғындардың өмір сүру деңгейін арттыру бойынша бірқатар нақты тапсырма берді.
