Астана. 29 мамыр. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Еуразиялық экономикалық одаққа (ЕАЭО) мүше мемлекеттерді өнеркәсіп пен агроөнеркәсіп кешеніне цифрлық технологияларды белсенді енгізуге шақырды. Оның айтуынша, цифрландыру – экономиканың бәсекеге қабілеттілігі мен тұрақты өсімін қамтамасыз ететін негізгі факторлардың бірі.
Жұма күні Астанада өткен Жоғары Еуразиялық экономикалық кеңестің отырысында сөйлеген сөзінде Мемлекет басшысы роботтандыру, өнеркәсіп пен тау-кен металлургия салаларындағы бұлтты шешімдер, сондай-ақ ірі кәсіпорындардың «цифрлық егіздерін» пайдалану еңбек өнімділігін арттырып, шығындарды азайтатынын атап өтті.
«Ауыл шаруашылығын автоматтандыру өнімділікті арттыруға, су ресурстарын үнемдеуге және қоршаған ортаға түсетін жүктемені төмендетуге мүмкіндік береді», – деді Тоқаев.
Президент цифрландыру технологиялық трендке ілесу емес, елдің бәсекеге қабілеттілігін айқындайтын стратегиялық құрал екенін айтты.
Оның сөзінше, цифрлық жоспарлау және болжау мүмкіндіктерінің арқасында Қазақстан қатарынан екінші жыл рекордтық көлемде – 27 млн тонна астық жинап отыр. Сонымен бірге елімізде барлық ауыл шаруашылығы жерлерін толық цифрландыру жұмыстары жүргізілуде.
Агродрондар, спутниктік навигация және метеостанциялар деректерін пайдалану аясы кеңейіп келеді. Жер учаскелерін пайдалануға беру рәсімі электронды форматқа көшірілуде. Сондай-ақ аграршыларды мемлекеттік қолдау жүйесін толық цифрландыру көзделіп отыр, бұл сыбайлас жемқорлық тәуекелдерін азайтуға мүмкіндік береді.
Мемлекет басшысы ЕАЭО елдерінің күш-жігері одақтың жаһандық азық-түлік нарығындағы позициясын нығайтуға қабілетті жоғары технологиялық бастамаларды қолдауға бағытталуы тиіс екенін айтты.
«Агроөнеркәсіп кешеніндегі кооперациялық жобаларды қаржылай қолдау мәселесіне қатысты Еуразиялық экономикалық одақ туралы шартқа енгізілген түзетулер осы бағыттағы маңызды қадам болып табылады», – деп түйіндеді Тоқаев.
