Астана. 21 маусым. ИНТЕРФАКС-ҚАЗАҚСТАН — Қасым-Жомарт Тоқаев Қазақстан мен Өзбекстан арасындағы мемлекет басшылары әкімшіліктері деңгейіндегі белсенді өзара іс-қимылды дамытуды қолдайтынын мәлімдеді.
«Біздің саяси жүйелерімізде Президент әкімшіліктері маңызды рөл атқарады. Сондықтан әкімшіліктер арасындағы белсенді жұмыс байланыстарын жан-жақты қолдаймын. Өзара ықпалдастығымыз неғұрлым тығыз болса, Орталық Азиядағы тұрақтылықты қамтамасыз етуге, өңірлік ынтымақтастықты нығайтуға соғұрлым тиімді болады. Өйткені Қазақстан да, Өзбекстан да көптеген көрсеткіш бойынша ірі мемлекеттер», – деді Тоқаев жексенбі күні Астанада Саида Мирзиёевамен кездесуде.
Президент Мирзиёеваның сапары Астана мен Ташкент арасындағы стратегиялық әріптестікті ілгерілету тұрғысынан ерекше маңызға ие екенін атап өтті.
«Сіздің сапарыңызды Қазақстан мен Өзбекстан арасындағы ынтымақтастықты дамытуға ықпал ететін өте пайдалы қадам ретінде бағалаймыз. Бүгінде екі ел де өз дамуының шешуші кезеңінде тұр. Бізге бейбітшілік пен қауіпсіздік қажет. Тек осындай жағдайда ғана реформаларды табысты жүзеге асыра аламыз», – деді Мемлекет басшысы.
Тоқаев сондай-ақ өзінің Бұхара қаласына жасаған жұмыс сапарын еске алып, онда Өзбекстанның бірқатар саладағы жетістіктерімен, соның ішінде жасанды интеллект пен цифрландыру бағытындағы табыстарымен танысқанын айтты.
«Әлем жасанды интеллектіні дамыту бағытымен қарқынды алға жылжып келеді. Сондықтан заман ағымынан қалмай, осы үдеріске сай болуға дайын болуымыз керек», – деді Президент.
Өз кезегінде Саида Мирзиёева кездесуге мүмкіндік жасағаны үшін Қасым-Жомарт Тоқаевқа алғыс білдірді.
«Сізге Шавкат Мирзиёевтің шынайы сәлемін жеткізу – мен үшін үлкен мәртебе. Шавкат Миромонұлы Қазақстанмен көпқырлы ынтымақтастықты тереңдетуге әрдайым айрықша мән береді. Ол жоғары деңгейде қол жеткізілген барлық келісімдер мен бірлескен жобалардың орындалу барысын жеке бақылауында ұстайды», – деді Мирзиёева.
Оның айтуынша, Өзбекстан мен Қазақстан Орталық Азиядағы тұрақтылық пен орнықты дамуды қамтамасыз ету жолында бірлесіп жұмыс істеп келеді және бұл ынтымақтастық нақты нәтижесін беруде.
«Біз бірге өңіріміздің үнін біртұтас әрі жаһандық деңгейде естілетіндей етіп қалыптастырып жатырмыз. Өзбекстанда бауырлас Қазақстанда жүзеге асып жатқан барлық өзгерістерді шын жүректен құптаймыз. Қазақстан – біздің сенімді одақтасымыз. Біз мұны үнемі айтып келеміз», – деді Өзбекстан Президенті Әкімшілігінің басшысы.
Кездесу барысында екі ел арасындағы сауда-экономикалық және мәдени-гуманитарлық ынтымақтастықты одан әрі кеңейту мәселелері де талқыланды. Сонымен қатар Қазақстан мен Өзбекстанда жүргізіліп жатқан жүйелі саяси және әлеуметтік-экономикалық реформалар жөнінде пікір алмасу өтті.
