Астана. 1 наурыз. Интерфакс-Қазақстан – Қазақстан президенті Қасым-Жомарт Тоқаев Біріккен Араб Әмірліктері, Сауд Арабиясы, Катар, Бахрейн және Кувейт мемлекеттерінің басшыларына жеке жолдаулар жолдады. Бұл туралы Мемлекет басшысының баспасөз хатшысы Айбек Смадияров хабарлады.
Президент баспасөз хатшысының айтуынша, жолдауда аталған елдердің халқына шынайы қолдау білдірілген.
«Қасым-Жомарт Тоқаев Қазақстан үшін достас әрі бауырлас мемлекеттердің егемендігі мен қауіпсіздігіне нұқсан келтіруге бағытталған кез келген әскери әрекеттерді қатаң айыптады», – деді Смадияров.
«Біздің еліміз күрделі халықаралық мәселелер мен қарулы қақтығыстарды тек дипломатиялық жолмен реттеуді қолдайды», – делінген Қазақстан Президентінің жолдауларында.
Мемлекет басшысы сондай-ақ Қазақстан бауырлас араб елдеріне қолынан келгенше көмек көрсетуге дайын екенін мәлімдеп, олардың жоғары басшылығымен тұрақты жұмыс байланыстарын одан әрі жалғастыруға үміт білдірді.
