Вашингтон. 6 қараша. ИНТЕРФАКС – Түркия Ресейден сатып алған С-400 зениттік-зымыран кешендерін (ЗЗК) қаруланудан алып тастауды жоспарлап отырған жоқ. Дегенмен, АҚШ тарапымен бірлескен бақылау механизмін енгізуге дайын екенін мәлімдеді, деп хабарлайды Bloomberg агенттігі бейсенбі күні өз дереккөздеріне сілтеме жасап.
Агенттіктің хабарлауынша, Анкара С-400 мәселесінде ымыраға келуге әзір екенін білдіргенімен, Вашингтон талап етіп отырғандай бұл жүйеден толық бас тартуға ниетті емес.
Дереккөздер мәліметінше, Түркия С-400 жүйесіне қатысты техникалық әскери бақылау механизмін АҚШ-пен бірлесе құруға дайын.
Сонымен қатар, Bloomberg Түркияның АҚШ-тан 40 бірлік F-35 жойғыш-бомбалаушы ұшағын сатып алуға мүдделі екенін атап өтеді. Алайда бұл үшін Конгресстің С-400 жүйесін сатып алуға байланысты салған санкцияларын жою қажет.
Агенттіктің деректеріне сәйкес, қыркүйек айында Вашингтонда Түркия президенті Режеп Тайып Ердоғанмен кездесуде АҚШ президенті Дональд Трамп Түркияға F-35 ұшақтарын сату мәселесін қарастыруға дайын екенін білдірген. Алайда келісім әлі жүзеге аспаған.
Bloomberg дереккөздерінің айтуынша, қазіргі таңда Түркия америкалық Lockheed Martin қорғаныс компаниясымен F-16 ұшақтарына қатысты жаңа көпмиллиардтық келісімдер бойынша баға мәселесін шешу үшін келіссөздердің келесі кезеңін жүргізіп жатыр. Бұл мәселе Трамп пен Ердоған арасындағы кездесуде де талқыланған.
АҚШ-тың Түркиядағы елшісі Томас Баррак маусым айының соңында екі ел арасында F-35 ұшақтарын бірлесіп өндіру бағдарламасынан Түркияны шығару мәселесі 2025 жылдың соңына дейін шешілуі мүмкін екенін айтқан.
Еске салсақ, Түркия Ресейден төрт дивизион С-400 кешенін сатып алған болатын. 2019 жылғы 23 қазанда «Рособоронэкспорт» компаниясы Түркияға келісімдегі барлық С-400 жүйелерін, оның ішінде зымырандарды да мерзімінен бұрын жеткізгенін мәлімдеді.
АҚШ бұған дейін бірнеше рет Түркияның С-400 сатып алуына алаңдаушылық білдіріп, бұл жүйелер арқылы Ресейдің F-35 ұшақтары туралы құпия ақпаратты алу қаупі бар екенін алға тартқан. Сонымен қатар, Пентагон Анкара F-35 ұшақтарын алғысы келсе, С-400 жүйесін Ресейге қайтаруы тиіс екенін айтқан.
Нәтижесінде, Вашингтон Түркияны F-35A ұшақтарын өндіру бағдарламасынан шығарып, CAATSA (Американың қарсыластарына санкциялар арқылы қарсы тұру туралы заң) аясында шектеу шараларын енгізген.
