Дели. 12 шілде. ИНТЕРФАКС – Үндістан билігі жексенбі күні Ормуз бұғазында Кипр туы астында жүзген сауда кемесіне жасалған шабуылды қатаң айыптады. Кеме бортында Үндістан азаматтары болған. Бұл туралы Hindustan Times басылымы хабарлады.
«Біз бүгін Оман жағалауында GFS Galaxy коммерциялық кемесіне жасалған шабуылды айыптаймыз. Кемеде болған Үндістанның 11 азаматының 10-ы құтқарылды, ал бір азаматтың хабар-ошарсыз кеткені туралы мәлімет бар», – делінген Үндістан Сыртқы істер министрлігінің мәлімдемесінде.
Басылымның атап өтуінше, ведомство мәлімдемесінде Иран туралы ешқандай ақпарат келтірілмеген.
Мәлімдемеге сәйкес, Үндістанның Омандағы елшілігі жергілікті билікпен бірлесіп іздестіру-құтқару жұмыстарын жүргізіп жатыр. Дели Оман билігіне көрсеткен қолдауы үшін алғыс білдірді.
Үндістанның Сыртқы істер министрлігі тараптарды жағдайды ушықтырмауға, ахуалды дипломатиялық жолмен реттеу үшін келіссөздерді жалғастыруға шақырды. Сонымен қатар өңірдегі коммерциялық кемелер мен азаматтық инфрақұрылымға жасалып жатқан шабуылдарды тоқтатуды және халықаралық сулардағы кеме қатынасының еркіндігін қалпына келтіруді талап етті.
Бұған дейін АҚШ Қарулы күштерінің Орталық қолбасшылығы америкалық әскери күштердің Ормуз бұғазында Кипр туы астында жүзген сауда кемесінің атқылануына жауап ретінде Иран аумағына кезекті соққылар жасағанын хабарлаған болатын. Бұған жауап ретінде Иран да соққы жасады.
Кейін Иран парламентінің ұлттық қауіпсіздік комитетінің өкілі Эбрахим Резаи Тегеранның Ормуз бұғазын бақылаудан бас тарту ниеті жоқ екенін мәлімдеді.
