Мәскеу. 30 желтоқсан. ИНТЕРФАКС — Стамбұлда өткен ресейлік-украиналық келіссөздердің нәтижесінде Ресейге шамамен 2,3 мың әскери қызметші мен 170-ке жуық азаматтық тұлға оралды. Алайда бұл үдеріс Украинаның бастамаларды жауапсыз қалдыруына байланысты тоқтаған. Бұл туралы Ресей Сыртқы істер министрінің орынбасары Михаил Галузин мәлімдеді.
Оның айтуынша, Стамбұлда қол жеткізілген уағдаластықтар аясында Ресейге 2,3 мыңға жуық әскери және шамамен 170 бейбіт тұрғын қайтарылған. Ал украин тарабына 2,4 мыңдай әскери қызметші мен 170-ке жуық азаматтық тұлға берілген. Бұл туралы Галузин сейсенбі күні жарияланған «Известия» газетіне берген сұхбатында айтты.
Сондай-ақ оның мәліметінше, Украинаға 12 мың қаза тапқан әскери қызметшінің мәйіті тапсырылған, ал Ресейге шамамен 200 мәйіт қайтарылған. «Бұл үдеріс алдағы уақытта да жалғасады деп ойлаймын», – деді ол.
Стамбұл форматының қазіргі жағдайына тоқталған Галузин Киевтің келіссөздерді тоқтатқанын, оның ішінде Ресей тарапы ұсынған бірқатар бастамаларға жауап бермегенін атап өтті. Атап айтқанда, сөз қауіпсіздік кепілдіктері жөніндегі ұсыныстар пакеті, сондай-ақ әскери, саяси және гуманитарлық мәселелер бойынша үш жұмыс тобын құру арқылы Стамбұл процесін нақтылау және жандандыру жөніндегі бастамалар туралы болып отыр, деді Ресей СІМ басшысының орынбасары.
