Вашингтон. 30 желтоқсан. ИНТЕРФАКС — АҚШ әскерилері Тынық мұхитында есірткі тасымалдаумен айналысқан болуы мүмкін кезекті кемеге соққы берді. Бұл туралы АҚШ Қарулы күштерінің Оңтүстік қолбасшылығы хабарлады.
Әскерилердің X әлеуметтік желісіндегі мәлімдемесіне сәйкес, 29 желтоқсанда АҚШ Қорғаныс министрі *Пит Хегсет*тің нұсқауымен Southern Spear бірлескен жедел тобы халықаралық суларда әрекет еткен және террористік ұйымдар басқарып отыр деп танылған кемеге «өлімге әкелетін кинетикалық соққы» жасаған.
Барлау деректеріне сүйенсек, аталған кеме Тынық мұхитының шығыс бөлігіндегі есірткі саудасының белгілі бағыттарымен қозғалып, заңсыз есірткі айналымына қатысқан.
Соққы салдарынан кемеде болған екі ер адам қаза тапты. Қолбасшылықтың мәліметінше, АҚШ әскери қызметшілері зардап шекпеген.
Хабарламада сондай-ақ АҚШ-тың соңғы бірнеше ай бойы Венесуэлаға қатысты қысым кампаниясын жүргізіп келе жатқаны атап өтіледі. Бұл науқан Кариб теңізіне мыңдаған әскери қызметшіні және авианосецтік соққы тобын жіберуді, есірткі тасымалдады деп күдікке ілінген нысандарға соққылар жасауды, сондай-ақ Венесуэла президенті Николас Мадуроға бағытталған қатаң мәлімдемелерді қамтиды.
