Астана. 30 желтоқсан. ИНТЕРФАКС-ҚАЗАҚСТАН — Қазақстан Үкіметі жыл қорытындысы бойынша азық-түлік өндірісі саласында оң серпін барын мәлімдеді. Премьер-министрдің баспасөз қызметінің хабарлауынша, республикада импортқа тәуелді өнімдердің өндірісі ұлғайып, экспорт көлемі де артып отыр.
Үкімет отырысынан кейін таратылған ақпаратқа сәйкес, Ұлттық экономика вице-премьері, министр Серік Жұманғарин төрағалық еткен Қауіпсіздік кеңесінің ведомствоаралық комиссиясында 2025 жылдың 11 айындағы көрсеткіштер жарияланды. Осы кезеңде ірімшік пен сүзбе өндірісі 48,5 мың тоннаға жетіп, 8,7 пайызға өсті. Қант өндірісі 142,2 мың тоннаны құрап, 18 пайызға артты. Құс еті 337,1 мың тоннаға (+3,3%), шұжық өнімдері 71,7 мың тоннаға (+6,9%), балық өнімдері 65,2 мың тоннаға (+9,5%) жетті.
Импортқа тәуелділікті толықтай қысқарту үшін инвестициялық жобалар іске асырылуда. Құс шаруашылығында 2028 жылға дейін жылына 241 мың тонна ет өндіруге мүмкіндік беретін, жалпы құны 167,9 млрд теңге болатын сегіз ірі жоба жүзеге асырылмақ.
2026 жылы Жамбыл облысында тәулігіне 8 мың тонна шикізат өңдейтін Zhongkai Guoyuan (Anhui) қант зауытының құрылысы басталады. Ал Алматы облысында Qazaq Arab Sugar инвесторымен осындай қуаттағы зауыт салу жөнінде келісімге қол қойылды.
Ірімшік, сүзбе және шұжық өнімдерімен қамтуды арттыру мақсатында 2026 жылы сүт өңдеу бойынша 35,1 млрд теңгеге 10 жоба, ет өңдеу бойынша 32,8 млрд теңгеге 14 жоба іске асырылмақ. Шикізат базасын жаңа сүт-тауар фермалары қамтамасыз етеді. Қазірдің өзінде жылына 540 мың тонна сүт өндіретін 95 ферма қаржыландырылған, олардың 53-і пайдалануға берілген.
Қазақстанның агроөнеркәсіп кешені өнімдерінің экспорты да өсім көрсетуде. Өсімдік шаруашылығында экспорттың ақшалай көлемі 41,2 пайызға артып, 2,3 млрд АҚШ долларын құрады. Бұл өсім бидай, күнбағыс майы, мал азығы, арпа және зығыр тұқымы сияқты дәстүрлі экспорттық тауарлар есебінен қамтамасыз етілді. Мал шаруашылығында экспорт 25,7 пайызға өсіп, 222,6 млн долларды құрады.
Сыртқы нарықтарда қазақстандық АӨК өнімдеріне сұраныс тұрақты сақталып отыр. Экспорттың 80 пайыздан астамы импорттаушы алғашқы он елдің үлесіне тиесілі. Негізгі нарықтар қатарында Орталық Азия елдері, Қытай, Ресей, сондай-ақ Таяу Шығыс пен Еуропа мемлекеттері бар.
«Біздің міндет — дәстүрлі нарықтардағы позицияны нығайтумен қатар, жаңа перспективалы бағыттар есебінен экспорт географиясын кезең-кезеңімен кеңейту», — деді Сауда және интеграция бірінші вице-министрі Айжан Бижанова.
Экспорттаушыларды қаржылық және институционалдық қолдау Экспорттық-кредиттік агенттік пен QazTrade арқылы көрсетіледі. Жыл басынан бері АӨК өнімдерін экспорттаушыларға көрсетілген қолдау көлемі шамамен 119 млрд теңгені құрады.
30 желтоқсандағы ресми валюта бағамы — 1 АҚШ доллары үшін 504,76 теңге.
