Мәскеу/Астана. 30 желтоқсан. ИНТЕРФАКС — Телефон арқылы сөйлесу барысында Қазақстан Президенті Қасым-Жомарт Тоқаев Ресей Федерациясының Президенті Владимир Путинмен украиналық ұшқышсыз ұшу аппараттарының Новгород облысындағы Ресей президентінің мемлекеттік резиденциясына жасаған арандатушылық шабуылын қатаң айыптады. Бұл туралы сейсенбі күні Кремльдің баспасөз қызметі хабарлады.
Ресей Президентінің баспасөз қызметінің мәліметінше, жағдайды талқылау барысында мемлекет басшылары келе жатқан Жаңа жылмен бір-бірін жылы лебізбен құттықтап, екіжақты күн тәртібіндегі бірқатар өзекті мәселені қозғаған. Атап айтқанда, 2025 жылғы қарашада Қазақстан Президентінің Мәскеуге жасаған мемлекеттік сапарының қорытындысы бойынша қол жеткізілген уағдаластықтардың іске асырылу барысы сөз болған.
Өз кезегінде Қазақстан Президентінің баспасөз қызметі хабарлағандай, әңгіме барысында Қасым-Жомарт Тоқаев Украинадағы жағдайды реттеу жөніндегі келіссөздер процесінде байқалған ілгерілеуді құптап, тұрақты келісімдерге қол жеткізуге бағытталған саяси-дипломатиялық күш-жігерді жалғастырудың маңызын атап өткен.
Сонымен қатар Мемлекет басшысы Ресей Федерациясы Президентінің мемлекеттік резиденциясына жасалған шабуыл әрекетін айыптап, мұндай қадамдардың бейбіт процесті ілгерілетуге және қақтығысты саяси жолмен шешуге ықпал етпейтінін атап көрсетті.
Әңгіме барысында екі ел басшылары қазақстандық-ресейлік ынтымақтастықтың қазіргі жай-күйін де талқылап, өтіп бара жатқан жылдың екіжақты қатынастар үшін мазмұнды әрі нәтижелі болғанын атап өтті. Қазақстан Президентінің баспасөз қызметінің мәліметінше, негізгі қорытындылардың бірі ретінде Қазақстан мен Ресей арасындағы қатынастардың жан-жақты стратегиялық әріптестік пен одақтастық деңгейіне жетуі атап өтілген. Бұл екі мемлекет арасындағы өзара байланыстарды дамытудағы маңызды кезең ретінде бағаланды.
