Мадрид. 12 қаңтар. ИНТЕРФАКС — Куба билігі қазіргі уақытта АҚШ-пен тек көші-қонға қатысты техникалық мәселелер бойынша ғана байланыс ұстап отыр. Бұл туралы дүйсенбі күні Куба президенті Мигель Диас-Канель мәлімдеді.
«Біз АҚШ билігімен көші-қонға байланысты техникалық мәселелерден өзге тақырыптар бойынша келіссөз жүргізіп отырған жоқпыз», — деп жазды ол X әлеуметтік желісіндегі парақшасында.
Сонымен қатар Диас-Канель Гавана мен Вашингтон арасында тең құқықты және өзара құрметке негізделген диалог болған жағдайда, даулы мәселелерді талқылауға Кубаның дайын екенін атап өтті.
«Біз әрқашан АҚШ-тың әртүрлі әкімшіліктерімен, соның ішінде қазіргі билікпен де, байыпты әрі жауапты диалог жүргізуге дайын болдық. Мұндай диалог теңдікке, егемендікті құрметтеуге, өзара сыйластыққа және халықаралық құқық нормаларын сақтауға негізделуі тиіс», — деді ол.
Куба басшысы сондай-ақ елдер бір-бірінің ішкі істеріне араласпай, өзара тиімді нәтижелерге ұмтылған жағдайда ғана диалог мүмкін болатынын айтты.
«Тарих көрсеткендей, АҚШ пен Куба арасындағы қатынастарды дамыту үшін дұшпандық, қоқан-лоқы мен экономикалық қысым емес, халықаралық құқық нормаларын сақтау қажет», — деді Диас-Канель.
Жексенбі күні Куба президенті АҚШ тарапынан жасалатын қысымға елдің қарсы тұруға дайын екенін де мәлімдеген.
«Куба ешкімге шабуыл жасап отырған жоқ, алайда 66 жылдан бері АҚШ тарапынан қысымға ұшырап келеді. Ел Отанын қорғауға соңғы тамшы қаны қалғанша дайын», — деп жазды ол X әлеуметтік желісінде.
Осыған дейін АҚШ президенті Дональд Трамп Кубаны «кеш болмай тұрғанда» Вашингтонмен ынтымақтастық орнатуға шақырған. Сондай-ақ ол Кубаға бұдан былай мұнай да, қаржы да берілмейтінін айтып, бұл елдің ұзақ жылдар бойы Венесуэладан келетін мұнай мен қаржыға тәуелді болғанын мәлімдеді.
