Астана, 19 қаңтар. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев парламенттік реформа жөніндегі жұмыс тобымен конституциялық реформаның негізгі тәсілдерін талқылады. Бұл туралы Мемлекет басшысының баспасөз қызметі хабарлады.
Іс-шара барысында мемлекеттік кеңесші Ерлан Карин президентті парламентті трансформациялауға қатысты ұсынылып отырған конституциялық өзгерістердің елеулі көлемі туралы хабардар етті. Ал Президенттің құқықтық мәселелер жөніндегі көмекшісі Ержан Жиенбаев азаматтардың ұсыныстары негізінде жұмыс тобы мүшелері әзірлеген конституциялық реформаның негізгі бағыттарын таныстырды.
Атап айтқанда, өткен жылдың қазан айынан бері өткен отырыстарда бір палаталы жаңа парламенттің қызметіне қатысты мәселелердің толық спектрі қаралды. Олардың қатарында депутаттар саны, өкілеттік мерзімі, сайлау тәртібі, заң шығару тетіктері, сондай-ақ биліктің өзге институттарымен өзара іс-қимыл мәселелері бар.
«Бірнеше айдың ішінде конституциялық реформаға қатысты өз бастамаларын барлық жеті саяси партия, ондаған үкіметтік емес ұйым, бизнес-құрылымдар, сондай-ақ құқықтанушы ғалымдар мен сарапшылар жолдады. Парламенттік реформаға қатысты ұсыныстармен қатар, жұмыс тобына жалпы конституциялық құрылымға, саяси және қоғамдық институттарды жетілдіруге қатысты азаматтардан шамамен 1,6 мың өтініш келіп түсті», — делінген хабарламада.
Отырысты қорытындылай келе, Мемлекет басшысы конституциялық реформаны талқылау басталғалы бері шамамен жарты жылға жуық уақыт өткенін атап өтті. Осы кезең ішінде қоғамда елдің жоғары заң шығарушы органын алдағы трансформациялаудың мақсаттары мен міндеттерін дұрыс түсіну қалыптасқанын айтты.
«Қасым-Жомарт Тоқаев қыркүйек айындағы Қазақстан халқына Жолдауынан кейін өрбіген қоғамдық пікірталастарды мұқият бақылап отырғанын атап өтті. Мемлекет басшысы талқылаулардың барлық нәтижелерін, сараптамалық қорытындыларды, ұсынылып отырған түзетулер жобаларын, сондай-ақ конституциялық реформаға қатысты азаматтардың көптеген ұсыныстарын егжей-тегжейлі зерделеуде», — деп мәлімдеді баспасөз қызметі.
Президент өткен жылдың 8 қыркүйегінде Қазақстан халқына жолдаған Жолдауында екі палаталы парламенттің орнына бір палаталы парламент құру мүмкіндігін зерделеуді және бұл мәселені референдумға шығаруды ұсынған болатын. Ол реформаның ерекше сипатын ескере отырып, азаматтық секторда, сарапшылар қауымдастығында және қолданыстағы парламентте пікірталастар кемінде бір жылға созылатынын, «осыдан кейін 2027 жылы жалпыұлттық референдум өткізіп, одан соң Конституцияға қажетті өзгерістер енгізуге болатынын» айтқан еді.
Қазан айының басында Президент парламенттік реформа жөніндегі жұмыс тобын құру туралы жарлыққа қол қойды. Оның құрамына мәжіліс пен сенат депутаттары, Қазақстан халқы Ассамблеясының өкілдері, саяси партиялар фракцияларының жетекшілері, ғылыми институттардың басшылары, құқықтанушы ғалымдар, сондай-ақ сарапшылар мен Ұлттық құрылтай мүшелері енді.
Қазақстанның қазіргі парламенті 1995 жылдан бері сенат пен мәжілістен тұратын екі палаталы құрылымда жұмыс істеп келеді.
