Астана, 19 қаңтар. ИНТЕРФАКС-ҚАЗАҚСТАН — Қазақстан алдағы бес жылда ірі және ұсақ қара мал етінің өндірісін 1,2 млн тоннадан 1,8 млн тоннаға дейін ұлғайтып, оның экспортын 82 мың тоннадан 165 мың тоннаға дейін арттыруды жоспарлап отыр. Бұл туралы Үкіметтің баспасөз қызметі хабарлады.
Аталған көрсеткіштер Үкімет отырысында қабылданған 2026–2030 жылдарға арналған мал шаруашылығын дамытудың кешенді жоспары жобасында көзделген.
Кешенді жоспарды іске асыру ірі қара мал басын 7,9 млн-нан 12 млн басқа дейін, ал ұсақ мал санын 20,2 млн-нан 28 млн басқа дейін көбейтуді қарастырады.
Құжатта ауыл шаруашылығы жануарларының барлық түрлері бойынша асыл тұқымды мал сатып алуға жылдық 6 пайыздық мөлшерлемемен жеңілдетілген несиелеу бағдарламасын іске қосу жоспарланған. Бұл бағыттағы жыл сайынғы қаржыландыру қажеттілігі 300 млрд теңгені құрайды.
Қашыртпа мал шаруашылығын дамыту және жайылымдық инфрақұрылымды қалыптастыру мақсатында 2026 жылға арналған қаржыландыру көлемі 50 млрд теңге болатын, жылдық 6 пайыздық мөлшерлемемен бірыңғай жеңілдетілген кредиттік өнім көзделген.
Сонымен қатар жем-шөп дайындау техникасы мен жабдықтарын сатып алуға жылдық 5 пайыздық мөлшерлемемен жеңілдетілген қаржыландыру енгізу жоспарланып отыр. Бұл бағыттағы қаржыландыру қажеттілігі 50 млрд теңгені құрайды.
Бұдан бөлек, мал шаруашылығы саласындағы айналым қаражатын толықтыру үшін жылдық 5 пайыздық мөлшерлемемен жеңілдетілген несиелеу бағдарламасын іске қосу жоспарланған. Бұл шараға қажетті жалпы қаржы көлемі 225 млрд теңге деп бағаланып отыр. Қаржыландыруға қолжетімділікті кеңейту үшін «Даму» қоры арқылы несиелерді кепілдендіру тетігін қолдану көзделген.
Ауыл шаруашылығы министрлігінің деректеріне сәйкес, мал шаруашылығы Қазақстанның ауыл шаруашылығы жалпы өнімінің 39 пайызын құрайды. 2025 жылы сүт өндірісі 3,8 млн тоннаға жетіп, 5 пайызға өскен. Ал ет өндірісінің көлемі 1,2 млн тоннаны құрап, өткен жылмен салыстырғанда 2,6 пайызға артты.
19 қаңтардағы ресми валюта бағамы — 512,16 теңге / 1 АҚШ доллары.
