Астана. 20 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев болашақ бірпалаталы парламентті «Құрылтай» деп қайта атау идеясын қолдап, оның 145 депутаттан тұратынын мәлімдеді.
«Парламентті Құрылтай деп қайта атауды қолдаймын», – деді Тоқаев сейсенбі күні Қызылордада өткен V Ұлттық құрылтайда сөйлеген сөзінде.
Мемлекет басшысының айтуынша, жаңа бірпалаталы парламент 145 депутаттан тұрады және 8 комитеттен құралады.
Құрылтайдың өкілеттік мерзімі бұрынғыдай – 5 жыл болып қалады.
Пропорционалды жүйе бойынша парламентке өту шегі 5% деңгейінде сақталады.
Сонымен қатар, Президент жаңа бірпалаталы парламентте президенттік квота да, Қазақстан халқы Ассамблеясының (ҚХА) квотасы да болмайтынын атап өтті.
