Tengrinews хабарлайды: «Оқу-ағарту министрі Жұлдыз Сүлейменова мектептегі жаратылыстану-математика бағытындағы пәндерді біріктіруге қатысты ведомствоның ұстанымын түсіндірді. Бұл туралы ол Үкімет отырысынан кейін өткен брифингте мәлімдеді. Жұлдыз Сүлейменова 2025 жылы алқа мәжілісінде пәндердің үш тобын біріктіру туралы шешім қабылданғанын еске салды. Олар: физика, химия және биология — «Жаратылыстану ғылымдары» тобына; алгебра мен геометрия — «Математика» тобына; Дүниежүзі тарихы мен құқық негіздері — «Әлеуметтік ғылымдар» тобына біріктірілуі тиіс еді. Алайда бұл реформа тоқтатылды. Оның басты себептері — іргелі ғылымдарды жеке оқыту қажеттілігі және педагогтардың жұмыс жүктемесін ескеру. «Біз бұл мәселені мұғалімдер қауымдастығымен талқылап, жағдайды сараладық. Балаларымыз цифрлық әлемде іргелі пәндерді терең білуі үшін бұл реформаны тоқтата тұруды ұйғардық», — деп түсіндірді Сүлейменова».
Евразия24 пікірі:
Біздіңше, Оқу-ағарту министрі бұл шешімі арқылы орта білім беру жүйесінің «өз-өзіне ор қазуға» жол бермеді. Пән мұғалімдерінің, әсіресе жаратылыстану бағытындағы мамандардың тапшылығы жағдайында пәндерді біріктіру мәселені шешпек түгілі, әр пәннің оқытылу сапасын айтарлықтай төмендетер еді. Өйткені физика — химия емес, химия — биология емес, ал биология — физика емес. Бірден үш пәнді теңдей алып жүретін әмбебап педагогтарды табу — өте қиын шаруа. Министрдің «цифрлық әлем» туралы айтқаны — бұл жердегі ең негізгі түйін. Қалыпты алгебрасыз бағдарламалауды қалайша ұлттық идея деңгейінде талқылауға болады? Физикасыз ешкім инженер бола алмайды. Ал медицина мен биотехнология тікелей биологияға байланған. Қазақстандық оқушылардың PISA рейтингінде абстрактілі ойлау мен оқығанын түсіну бойынша тұрақты түрде төмен балл алуы, керісінше, мектептегі іргелі ғылымдарды оқытуды күшейтуді талап етеді. Ойдан шығарылған «пәндер интеграциясымен» білімнің қалдықтарын мүлдем жойып жібермеу керек. Сондықтан дұрыс шешім қабылдаған министр Жұлдыз Сүлейменованың бұл қадамын құптаймыз.
