ҚР Конституциялық соты хабарлайды: «Конституциялық комиссия мүшелері ҚР Конституциясының негізгі бөлімдеріне өзгерістер енгізу бойынша ауқымды жұмыс жүргізді. Атап айтқанда, еліміз Парламентінің өкілеттіктері мен рәсімдеріне айтарлықтай ревизия жасалды. Бұл туралы Комиссия отырысында Конституциялық сот төрағасының орынбасары Бақыт Нұрмұханов мәлімдеді. (…) «Президент» бөліміне вице-президенттің құқықтық мәртебесі мен өкілеттіктеріне арналған жаңа бап енгізілді», – деп атап өтті Бақыт Нұрмұханов. (…) Жеке бөлімде республика азаматтарынан жасақталатын Қазақстанның Халықтық кеңесі туралы ережелер топтастырылған. Бұл ретте жаңа жоғары консультативтік орган Қазақстан халқының мүдделерін білдіретіні және заңнамалық бастама құқығына ие болатыны бекітіледі. Сонымен қатар, салалық конституциялық заңда көрсетілген Конституциялық соттың құқықтық мәртебесі туралы ережелер де Конституция жобасына енгізілді. «Бұл оның мәртебесін бүкіл ел аумағында конституциялық бақылауды жүзеге асыратын және Конституция үстемдігін қамтамасыз ететін тәуелсіз мемлекеттік орган ретінде бекітуді көздейді», – деп баса айтты Бақыт Нұрмұханов. Ол сондай-ақ Конституциялық сот шешімдерінің құқықтық салдары нақты айқындалатынын қоса айтты».
Евразия24 пікірі:
Конституциялық реформа аясында жоспарланған Парламенттің рәсімдері мен өкілеттіктерін қайта қарау — заң шығарушы билік тармағының Үкімет ұсынған заңдарды жай ғана «мақұлдау» режимінен шығып, нақты субъектілікке және тәуелсіздікке ұмтылуын білдіреді. Айтпақшы, сонау 2017 жылдың өзінде-ақ ҚазМЗУ Құқықтық саясат және конституциялық заңнама ҒЗИ директоры болған профессор Сергей Ударцев конституциялық реформаның басты міндеті билік тармақтары арасындағы қарым-қатынасты теңгерімдеу екенін айтқан болатын. Мұны, тұтастай алғанда, жақын арада Құрылтайға айналатын Парламенттің декларативті рөлінен арылып, нақты заң шығарушылық маңызын күшейту, яғни «билік дефицитін» жою қажеттілігі деп түсінуге болады. Ең қызықты жаңашылдық, әрине — Халықтық кеңес. Оның құзыреті мен құрамын ескерсек, билік «халық үніне құлақ асатын мемлекет» тұжырымдамасын институционалдандырып, халық өкілдеріне маңызды миссия жүктеп отырғандай әсер қалдырады. Мұның бәрі іске қосылғанда тиімділігі қандай болатынын күту — өте қызықты процесс. Ал вице-президент лауазымы — транзит кезіндегі «сақтандыру» секілді, бұл биліктің жекелену тәуекелдерін азайтуға бағытталған қадам.
