Қазақстан Республикасының Қорғаныс министрлігінің мәліметінше, 2026 жылы ел аумағында резервтегі 850-ден астам офицерді әскери қызметке шақыру жоспарланып отыр. Бұл шешім қолданыстағы «Әскери қызмет және әскери қызметшілердің мәртебесі туралы» заң аясында қабылданып, Қарулы Күштердің жауынгерлік қабілетін арттыруға және кәсіби даярланған әскери резервті нығайтуға бағытталған. Үкімет бекіткен жоспарға сәйкес, шақырылатын офицерлер әртүрлі күштік құрылымдарға бөлінеді. Атап айтқанда, олардың 700-і Қарулы Күштердің құрамын толықтырса, 80 офицер Шекара қызметіне, 64-і Ұлттық ұланға, ал 15-і Төтенше жағдайлар министрлігіне жіберіледі. Шақыру нақты қажеттілікке негізделген әскери-есептік мамандықтар бойынша жүзеге асырылады. Басымдық авиация, инженерлік қамтамасыз ету, артиллерия, радиотехника, әскери көлік, медицина, тыл қызметі, ақпараттық қауіпсіздік пен барлау салаларындағы мамандарға беріледі. Әскери қызметке денсаулық жағдайы жарамды, 29 жасқа дейінгі резервтегі офицерлер, ал медициналық мамандықтар бойынша — 32 жасқа дейінгі азаматтар шақырылады. Міндетті шарттардың бірі — сұранысқа ие әскери-есептік мамандықтың болуы. Шақырылған офицерлердің әлеуметтік кепілдіктері келісімшартпен қызмет ететін әскери қызметшілер деңгейінде қамтамасыз етіледі. Олар қызмет мерзімінде ақшалай қамтамасыз ету, тұрғын үй немесе тұрғын үй төлемдері, тамақтану және медициналық қызметпен қамтылады. Қызмет, негізінен, әскери есепте тұрған немесе тұрғылықты жері бойынша өтеледі. Министрлік мәліметінше, іріктеу барысында әскери қызметке ынталы әрі тұрақты жұмыс орны жоқ азаматтарға басымдық беріледі. Бұл, бір жағынан, әскери резервті күшейтуге, екінші жағынан, жастарды әлеуметтік тұрғыдан қолдауға бағытталған. Қорғаныс министрлігі атап өткендей, резервтегі офицерлерді шақыру — жоспарлы сипаттағы шара және ол толықтай қолданыстағы заңнама талаптарына сәйкес жүзеге асырылады.
Еуразия24 пікірі:
Қорғаныс министрлігі ресми хабарламасында шақырылатын офицерлердің қызмет ету мерзімін нақтылап айтпайды. Ал шын мәнінде бұл мерзім – 24 ай, яғни екі жыл. Әскери ведомство іріктеу кезінде жұмыссыз немесе өз еркімен ниет білдірген азаматтарға басымдық берілетінін атап өткенмен, жақсы қызметі мен тұрақты табысы бар жас офицерлердің де шақырылу ықтималдығын толық жоққа шығаруға болмайды. Министрлік 2026 жылғы шақырудың жоспарлы сипатта өтетінін мәлімдегенімен, бұл бұрын әскери қызмет өткерген қазақстандықтар жыл сайын қайта-қайта әскер қатарына тартылуы мүмкін дегенді білдірмейді. Дегенмен, бұл мәселеде тағы бір маңызды фактор бар — ол әскери қызметшілердің жалақысы. 2025 жылға дейін Қарулы Күштердегі ең өзекті мәселелердің бірі жалақы деңгейінің төмендігі болды. Соның салдарынан келісімшарт негізінде қызмет ететін әскери қызметшілердің басқа салаларға кету үрдісі байқалды. Осы жағдайдан кейін мемлекет әскери қызметшілердің еңбекақысын арттыру туралы шешім қабылдады. Open sources деректеріне сүйенсек, Ұлттық ұланда қызмет ететін әскери қызметшілердің жалақысы туралы нақты мәлімет бар. NewTimes басылымының жазуынша, редакцияның ресми сұрауына жауап ретінде ҚР Ұлттық ұланының баспасөз қызметі 2026 жылғы 1 қаңтардан бастап ақшалай қамтамасыз ету мөлшері келесідей болатынын хабарлаған: сержанттар үшін ең төменгі жалақы – 144 мың теңге, орташа деңгейі – 249 мың теңге; офицерлер үшін ең төменгі көрсеткіш – 259 мың теңге, орташа жалақы – 336 мың теңге. Бұған қоса, қызмет ерекшеліктеріне байланысты түрлі үстемақылар қарастырылған. 2026 жылы шақырылатын офицерлер өзге де әскери құрылымдарда осыған жуық деңгейде еңбекақы алатын болады деген болжам бар. Бұл тұрғыдан алғанда, жұмыссыз немесе мансаптық жолын енді бастаған жас офицерлер үшін екі жылдық әскери қызмет тұрақты табыс пен әлеуметтік кепілдіктерге ие болудың тиімді мүмкіндігіне айналуы мүмкін.
