Астана. 6 ақпан. ИНТЕРФАКС-ҚАЗАҚСТАН – Қазақстан Парламенті Сенаты жұма күні өткен пленарлық отырыста «Креативті индустрияларды қолдау және дамыту мәселелері бойынша кейбір заңнамалық актілерге өзгерістер мен толықтырулар енгізу туралы» заңды мақұлдады.
Аталған заң бұған дейін Мәжілісте қабылданған. Осылайша, құжат Парламент тарапынан толықтай қабылданды және мемлекет басшысының қол қоюына жіберіледі.
Заңның негізгі мақсаты – мәдениет саласын заманауи талаптарға сай жаңғырту, креативті индустрияларды дербес әрі экономикалық тұрғыдан маңызды сектор ретінде институционалдық тұрғыда қалыптастыру.
Құжатта төрт заңға өзгерістер мен толықтырулар енгізу көзделген. Атап айтқанда, «Мәдениет туралы», «Кинематография туралы», «Мемлекеттік жастар саясаты туралы» және «Мемлекеттік мүлік туралы» заңдарға түзетулер қарастырылған.
Сонымен қатар, заңнамаға «креативті индустрия қызметкері», «креативті индустрия субъектілерінің тізілімі» сияқты жаңа ұғымдар енгізіледі.
Мәдениет және ақпарат министрлігіне креативті индустрия жобаларына жеке инвестицияларды тарту деңгейін мониторингтеу және бағалау құзыреті беріледі. Ал жергілікті атқарушы органдарға креативті индустрия саласында кәсіпкерлікті дамыту арқылы таланттарды өзін-өзі іске асыруға, тиімді әрі лайықты еңбекке жағдай жасау міндеті жүктеледі.
Шығармашылық еркіндік пен кәсіби дамуды қамтамасыз ету мақсатында креативті индустрия қызметкерлерінің құқықтарын қорғауға бағытталған нормалар да көзделген.
Заңды қабылдау креативті индустриялар саласындағы мемлекеттік саясаттың жүйелі негізін қалыптастыруға, басқарудың барлық деңгейінде қолдау шараларын үйлестіруге және отандық контенттің ішкі әрі сыртқы нарықтағы бәсекеге қабілеттілігін арттыруға мүмкіндік береді.
Қазіргі таңда Қазақстанда креативті индустрия саласында 46 мыңнан астам субъект тіркелген, бұл салада шамамен 145 мың адам еңбек етеді. Креативті экономиканың елдің жалпы ішкі өніміндегі үлесі шамамен 1%-ды құрайды, ал 2017 жылдан бері сала көлемі үш еседен астам өскен.
