Астана. 10 ақпан. ИНТЕРФАКС-ҚАЗАҚСТАН — Қолданыстағы Конституция Қазақстанның соңғы 30 жылдағы жетістіктеріне елеулі үлес қосты, ал бұл үдерістегі айрықша еңбек елдің тұңғыш президенті Нұрсұлтан Назарбаевқа тиесілі. Бұл туралы Мемлекет басшысы Қасым-Жомарт Тоқаев Үкіметтің кеңейтілген отырысында мәлімдеді.
Президенттің айтуынша, қолданыстағы Конституцияның тарихи маңызын жоққа шығару көзделіп отырған жоқ. «Ол еліміздің соңғы үш онжылдықтағы барлық жетістіктерінде маңызды рөл атқарды. Бұл тұрғыда тұңғыш президент Нұрсұлтан Әбішұлы Назарбаевтың еңбегі зор», — деді Қасым-Жомарт Тоқаев.
Сонымен бірге Мемлекет басшысы Конституция ел тәуелсіздігінің алғашқы, күрделі қалыптасу кезеңінде қабылданғанын және сол уақыттың ерекшеліктерін бойында сақтағанын атап өтті.
Оның айтуынша, содан бері қазақстандық қоғам айтарлықтай өзгерді. «Барлық пессимистік болжамдарға қарамастан, Қазақстан халықаралық деңгейде беделі жоғары, қуатты мемлекет ретінде қалыптасты», — деді президент.
Қасым-Жомарт Тоқаев қазіргі әлемде геосаяси, геоэкономикалық және технологиялық сипаттағы терең өзгерістер жүріп жатқанын атап өтті. Ол соңғы жылдары Қазақстанда да ұлттық санаға әсер еткен ауқымды өзгерістер болғанын, тіпті қоғам үшін елеулі сынақтар туындағанын айтты. Осыған байланысты ел үшін мақсаттарды, құндылықтар мен қағидаттарды жаңартып, оларды конституциялық деңгейде бекіту аса маңызды екенін жеткізді.
