Астана. 10 ақпан. ИНТЕРФАКС-ҚАЗАҚСТАН — Қазақстан Үкіметі кәсіпкерлік қоғамдастықпен бірлесіп микро-, шағын және орта бизнесті қолдауға арналған қосымша қаржылық әрі реттеуші шараларды әзірлеуде. Бұл туралы Премьер-министр Олжас Бектенов мәлімдеді.
«Қолданыстағы құралдар ШОБ әлеуетін толық іске асыру үшін жеткіліксіз. Осыған байланысты Үкімет бизнес-қоғамдастықпен бірге қолдаудың қосымша тетіктерін пысықтап жатыр», — деді Олжас Бектенов сейсенбі күні өткен Үкіметтің кеңейтілген отырысында.
Оның айтуынша, негізгі бастамалардың бірі — шағын және орта кәсіпорындарды заманауи жабдықтармен қайта жарақтандыру бағдарламасы болмақ. «Бәйтерек» холдингінің арнайы бағдарламасы аясында кәсіпкерлер қосымша кепіл ұсынбай-ақ, 10 күн ішінде жабдық сатып алуға жеңілдетілген несие ала алады.
Премьер-министр Үкімет жаңа Салық кодексін бизнестің ұсыныстарын ескере отырып, кезең-кезеңімен және жұмсақ форматта енгізіп жатқанын атап өтті. Атап айтқанда, 2026 жылғы 1 қаңтарға дейінгі кезеңдер бойынша барлық салықтық тексерулерді тоқтату, сондай-ақ ағымдағы жылы жол берілген заңбұзушылықтар үшін микро және шағын бизнеске жауапкершілік шараларын қолданбау туралы шешім қабылданған.
2025 жылдың қорытындысы бойынша Қазақстанда жұмыс істеп тұрған шағын және орта бизнес субъектілерінің саны 5%-ға артып, 2,2 миллионнан асты. Бұл секторда жұмыспен қамтылғандар саны 3,9%-ға өсіп, 4,5 миллион адамды құрады. ШОБ-тың елдің жалпы ішкі өніміндегі үлесі 40,5% болды.
