Астана. 25 ақпан. ИНТЕРФАКС-ҚАЗАҚСТАН – Сәрсенбі күні Қазақстан президенті Қасым-Жомарт Тоқаевтың резиденциясында Италияда өткен Қысқы Олимпиада ойындарының чемпионы, мәнерлеп сырғанаушы Михаил Шайдоров және оның жаттықтырушылар құрамын құрметтеу рәсімі өтті, деп хабарлады мемлекет басшысының баспасөз қызметі.
Жоғары спорттық жетістіктері үшін Тоқаев Михаил Шайдоровты ІІ дәрежелі «Барыс» орденімен марапаттады. Оның кеңесші-жаттықтырушысы Алексей Урманов ІІ дәрежелі «Достық» орденін иеленді. Ал «Құрмет» ордені ұлттық құраманың бас жаттықтырушысы Әсем Қасановаға, мәнерлеп сырғанау жаттықтырушысы Станислав Шайдоровқа және Қазақстан конькимен мәнерлеп сырғанау одағының президенті Бауыржан Ералыға табысталды.
Марапаттау рәсімінде президент бұл Олимпиаданың бүкіл Қазақстан үшін айрықша оқиға болғанын атап өтті.
«Михаил Шайдоровтың мәнерлеп сырғанаудан алтын медаль жеңіп алуының арқасында Қазақстанның көк байрағы Олимпиада аренасында биікке көтерілді. Бүгінде Михаилмен бүкіл ел мақтанады, ал жас спортшылар үшін ол нағыз үлгіге айналды. Бұл – қазақстандықтар 32 жыл күткен тарихи жүлде. Сонымен қатар, бұл – отандық мәнерлеп сырғанаушылар жеңіп алған алғашқы Олимпиада алтыны. Әлем Қазақстанда да жарқын таланттардың бар екенін көрді, олар даңқты мәнерлеп сырғанаушы Денис Теннің жолын лайықты жалғастырып келеді. Михаил Шайдоровтың Олимпиададағы жарқын өнер көрсетуі – тарихи маңызы бар жетістік», – деді мемлекет басшысы.
Президент сондай-ақ олимпиада чемпионының әкесі әрі алғашқы жаттықтырушысы Станислав Шайдоровтың еңбегіне ерекше тоқталды.
«Станислав Александрович – Қазақстанның бірнеше дүркін чемпионы, әрі әке, әрі алғашқы жаттықтырушы ретінде Михаилдың мұз айдынындағы алғашқы қадамдарына жол ашты және өмірінің ең қиын сәттерінде әрдайым жанынан табылды. Мемлекет басшысы ретінде Сізге еліміздің туын әлемдік спорт аренасында биік көтерген осындай ұл тәрбиелегеніңіз үшін шынайы алғысымды білдіремін», – деді Тоқаев.
Сонымен қатар, президент мемлекет тарапынан бұқаралық және кәсіби спортты дамыту үшін барлық қажетті жағдай жасалатынын айтты.
Оның айтуынша, министрлікке, Ұлттық олимпиадалық комитетке және федерацияларға бірлескен жұмысты күшейтіп, ұлттық құраманың спортшыларына тиімді қолдау көрсету міндеті жүктеледі. Сондай-ақ 2029 жылы Алматыда өтетін қысқы Азия ойындарына дайындыққа ерекше назар аудару қажет екені атап өтілді. Президент бұл ойындардың жоғары деңгейде ұйымдастырылуы елдегі спорттың дамуына, сондай-ақ экономика мен туризм саласына жаңа серпін беретін маңызды оқиға болатынын жеткізді.
