Астана. 27 ақпан. Интерфакс-Қазақстан – Қазақстан мен Ұлыбритания екіжақты стратегиялық әріптестікті одан әрі нығайтуға дайын екенін мәлімдеді, деп Сыртқы істер министрлігінің баспасөз қызметі хабарлады.
Лондонда өткен сапар аясында Қазақстанның сыртқы істер министрі Ермек Көшербаев Ұлыбританияның сыртқы істер министрі Иветт Купермен келіссөздер жүргізді.
Министрліктің мәліметінше, тараптар қазақ-британ қатынастарының қазіргі деңгейін, олардың даму перспективаларын және сауда мен инвестиция, маңызды минералдар, көлік-логистика, қаржы, цифрландыру, білім беру және климат саясатындағы ынтымақтастықты кеңейту мәселелерін талқылады.
Кездесуде 2024 жылы қол қойылған Стратегиялық әріптестік және ынтымақтастық туралы келісімнің маңызы ерекше аталды. Бұл құжат ратификацияланғаннан кейін екі елдің өзара іс-қимылына жаңа мүмкіндіктер ашады.
«Биыл Қазақстан мен Ұлыбритания дипломатиялық қатынастардың орнағанына 34 жыл толуын атап өтеді. Осы уақыт ішінде Астана мен Лондон саяси диалогты нығайтып, сауда және инвестиция салаларында айтарлықтай серпінге қол жеткізді, сондай-ақ халықтар арасындағы байланыстар кеңейді. Ұлыбритания – Еуропадағы біздің маңызды әріптестеріміздің бірі, және біз стратегиялық серіктестігімізді одан әрі дамытуға мүдделіміз», – деді Ермек Көшербаев.
