Астана. 1 наурыз. Интерфакс-Қазақстан – Қазақстан Сыртқы істер министрлігі Иранда жүрген азаматтарға елден шығу тәртібін нақтылау үшін Қазақстанның дипломатиялық өкілдіктерімен дереу байланысуды ұсынды.
Министрлік мәліметінше, Иран Ислам Республикасының әуе кеңістігі жабылып, әуе рейстері уақытша тоқтағандықтан, азаматтардың елден шығу жолдары құрлықтағы шекаралар арқылы қарастырылып жатыр. Осыған байланысты Иран–Әзербайжан, Иран–Армения, Иран–Түркия және Иран–Түрікменстан бағыттары бойынша шығу мүмкіндігін алдын ала келісу қажет екені атап өтілген.
Бұған дейін СІМ Иран аумағында Қазақстанның 96 азаматы жүргенін хабарлаған. Оның ішінде 18 адам – дипломатиялық өкілдіктердің қызметкерлері, 2-еуі – студент, 70 азамат «Заркух» зауытында еңбек етеді. Тағы 6 Қазақстан азаматы Иранда жеке шаруаларымен жүр.
Сонымен қатар министрлік Иран аумағында жүрген Қазақстан азаматтарына жеке қауіпсіздік шараларын барынша күшейтіп, сақ болуды қатаң түрде ескертті.
