Астана. 1 наурыз. Интерфакс-Қазақстан – Таяу Шығыс бағытындағы рейстердің уақытша тоқтатылуына байланысты Air Astana әуе компаниясы өз есебінен шамамен 800 жолаушыны бір тәулікке қонақүйлерге орналастырды, деп хабарлады компанияның баспасөз қызметі.
Жексенбі күні таратылған мәліметке сәйкес, қазіргі уақытта жолаушылар мына бағыттар бойынша қонақүйлерге уақытша орналастырылған: Доха – 174 жолаушы; Дели (Алматы – Дубай рейсі) – 231 жолаушы; Дубай – 330 жолаушы.
Хабарламада жолаушыларды орналастыру бір тәулік мерзіміне қарастырылғаны нақтыланған.
«Әуе компаниясы Дубайдағы Flora Al Barsha және Flora Creek қонақүйлерімен бір тәуліктік тегін тұру мерзімі аяқталғаннан кейін Air Astana жолаушылары үшін арнайы тарифтер ұсыну туралы келісімге келді», – деп мәлімдеді компания.
Сондай-ақ әуе компаниясы жолаушыларға жақын уақытта Қазақстанның шетелдегі мекемелерінің жедел байланыс нөмірлеріне жүгінуді ұсынды. Бұл нөмірлер ҚР Сыртқы істер министрлігінің ресми сайтында жарияланған.
