Еуразиялық экономикалық комиссия хабарлайды:
«Еуразиялық экономикалық комиссияның интеграция және макроэкономика жөніндегі министрі Данияр Иманалиев пен БҰҰ Экономикалық және әлеуметтік кеңесінің (ЭКОӘК) төрағасы Лок Бахадур Тапа Нью-Йорктегі БҰҰ штаб-пәтерінде кездесу өткізіп, өңірлердің БҰҰ-ның Тұрақты даму күн тәртібін іске асыруға қосатын үлесі мәселесін талқылады (…). Сонымен қатар ЕЭК-тің интеграция және макроэкономика жөніндегі министрі Данияр Иманалиев БҰҰ-ның Халық қоныстануы қорының (ЮНФПА) атқарушы директоры Даяне Кейтамен келіссөздер жүргізді. Кездесу барысында ұйымның Еуразиялық экономикалық комиссиямен өзара түсіністік туралы меморандум жасау арқылы ынтымақтастықты ресми түрде жолға қоюға қызығушылық танытып отырғаны атап өтілді. БҰҰ құрылымы үшін ЕАЭО елдерінің көші-қон үдерістерін реттеу тәжірибесі мен азық-түлік қауіпсіздігін қамтамасыз ету саласындағы практикалық тәсілдері ерекше қызығушылық тудырады. Өйткені Одаққа мүше мемлекеттер әлемдік азық-түлік өндірісінде маңызды орын алады. Осыған байланысты Даяне Кейта демография, көші-қон және тұрақты даму бағыттары бойынша бірлескен зерттеулер жүргізу және тәжірибе алмасу мүмкіндігін қарастыруға дайын екенін білдірді».
Еуразия24 пікірі:
Алғаш қарағанда бұл кездесу ЕАЭО мен БҰҰ арасындағы диалогты ілгерілетуге бағытталған дипломатиялық қадам сияқты көрінеді. Алайда аталған құрылымдар арасындағы ынтымақтастық бұрыннан қалыптасқан. Мәселен, 2015 жылы ЕАЭО мен БҰҰ құрылымдары арасында статистика және деректер алмасу саласындағы өзара іс-қимыл туралы меморандумға қол қойылған болатын.
Еуразиялық экономикалық комиссия БҰҰ-ның Статистикалық комиссиясының жұмысына тұрақты түрде қатысып, Тұрақты даму мақсаттарының (SDG) көрсеткіштерін есептеу әдістемесін талқылауға атсалысады. Сонымен қатар БҰҰ-ның Азия және Тынық мұхиты өңіріне арналған экономикалық және әлеуметтік комиссиясымен (ESCAP) де өзара байланыс жолға қойылған. Бұл алаңда интеграция, көлік және тұрақты даму мәселелері қарастырылып, жаңа меморандумдарды әзірлеу бағытында жұмыс жүргізілуде.
Дегенмен нақты іске асырылып жатқан жобалар саны көп емес, олардың басым бөлігі зерттеу немесе сараптамалық сипатта. Себебі БҰҰ интеграциялық бірлестіктер үшін инвестиция тартатын құрылым болып саналмайды.
Ал ЕАЭО елдерінің көші-қон үдерістерін реттеу тәжірибесі мен азық-түлік қауіпсіздігін қамтамасыз ету саласындағы тәжірибесіне ерекше назар аударылуы кездейсоқ емес. Өйткені «еуразиялық интеграция» аясында еңбек ресурстарының еркін қозғалысы режимі енгізілген және ол іс жүзінде тиімді жұмыс істеп келе жатқан аз санды өңірлік бірлестіктердің бірі болып табылады.
