Нью-Йорк. 11 наурыз. ИНТЕРФАКС – Сәрсенбі күні АҚШ қор индекстері фьючерстерінің бағамы Таяу Шығыстағы қақтығыстың әрі қарай қалай өрбитіні және мұнай бағасының динамикасына қатысты белгісіздік аясында төмендеді.
АҚШ Еңбек министрлігінің мәліметінше, ақпан айында елдегі тұтыну бағаларының индексі (CPI) жылдық мәнде 2,4%-ға өсті. Осылайша инфляция қаңтардағы деңгейде сақталып, сарапшылардың болжамдарымен сәйкес келді. Бұл – өткен жылдың мамыр айынан бергі ең төменгі көрсеткіш.
Алдын ала сауда барысында AeroVironment компаниясының акциялары 10,8%-ға арзандады. Әскери дрондар өндірушісі 2026 жылға арналған түзетілген пайда бойынша әлсіз болжам ұсынған.
SLB (бұрынғы Schlumberger) акцияларының бағасы 2,6%-ға төмендеді. Мұнай сервистік компания Таяу Шығыстағы жағдайды мұқият бақылап отырғанын және өз қызметін соған сәйкес бейімдеп жатқанын мәлімдеді. Компанияның бағалауынша, бірінші тоқсандағы түсім күткеннен төмен болады. Сонымен қатар акцияға шаққандағы пайда шамамен 6–9 центке азаюы мүмкін қосымша шығындардың туындауы ықтимал. Компания хабарламасында жағдайдың өзгермелі сипатына байланысты бұл факторлар өзгеруі мүмкін екені айтылған.
Сонымен қатар International Business Machines және Alphabet Inc. акциялары 0,3%-ға, Apple Inc. және ConocoPhillips – 0,2%-ға, Chevron Corp. және Exxon Mobil – 0,1%-ға арзандады. Walmart Inc. акциялары 0,7%-ға, Salesforce Inc. қағаздары 0,5%-ға төмендеді.
Әскери-өнеркәсіптік кешен компанияларының акциялары да арзандады. Атап айтқанда, Northrop Grumman Corp. – 0,4%-ға, RTX Corp. – 0,6%-ға, Lockheed Martin – 0,2%-ға төмендеді.
Сонымен бірге Oracle Corp. акцияларының бағасы 10%-дан астамға өсті. Әлемдегі ірі бағдарламалық жасақтама өндірушілерінің бірі үшінші қаржылық тоқсанда (желтоқсан–ақпан) сарапшылар күткеннен жоғары түзетілген пайда мен түсім көрсеткен. Компания сондай-ақ жасанды интеллект қолданылатын деректерді өңдеу орталықтарына деген сұраныстың артуы алдағы екі жылда кірістің болжамнан жоғары қарқынмен өсуіне ықпал ететінін мәлімдеді.
Eli Lilly фармацевтикалық компаниясының акциялары 0,1%-ға қымбаттады. Компания алдағы он жыл ішінде Қытайдағы өндірісін кеңейтуге 3 млрд доллар инвестиция салуды жоспарлап отырғанын хабарлады.
Спорттық тауарлар өндірушісі Nike Inc. акциялары 2%-ға өсті. Бұған Barclays сарапшыларының компания акциялары бойынша ұсынысын «нарық деңгейінде» деген бағадан «нарықтан жоғары» деңгейіне көтеруі әсер етті.
Сондай-ақ Nvidia Corp. акциялары 0,1%-ға, Micron Technology Inc. – 0,9%-ға, Boeing Co. – 0,4%-ға, Tesla – 0,2%-ға қымбаттады.
Мәскеу уақыты бойынша 15:42-дегі дерекке сәйкес, Dow Jones индексі бойынша наурыз фьючерстерінің бағамы 0,4%-ға төмендеп, 47 559 пунктті құрады. Standard & Poor’s 500 индексі фьючерстері 0,2%-ға төмендеп, 6 771 пунктке жетті. Ал Nasdaq 100 индексі бойынша наурыз келісімшарттарының бағасы 0,2%-ға азайып, 24 929,75 пункт болды.
