* Эвакуация басталғалы бері Ираннан 69 қазақстандық елге қайтарылды
Астана. 12 наурыз. ИНТЕРФАКС-ҚАЗАҚСТАН – Ирандағы әскери қақтығыс басталғаннан кейін Таяу Шығыс елдерінен Қазақстанға 9 мың 926 қазақстандық оралды. Бұл туралы бейсенбі күні Қазақстан Сыртқы істер министрлігінің баспасөз қызметі хабарлады.
«Мемлекеттік органдар мен Қазақстанның дипломатиялық өкілдіктерінің көмегімен Таяу Шығыс өңірінен Қазақстанға 9 926 қазақстандық қайтарылды», – делінген хабарламада.
СІМ мәліметінше, Ираннан Түрікменстан шекарасындағы құрлықтағы өткізу пункттері арқылы тағы үш Қазақстан азаматы жерүсті жолымен эвакуацияланған.
«Жалпы эвакуация басталғалы бері Ираннан Қазақстанға 69 азамат қайтарылды», – деп нақтылады ведомствоның баспасөз қызметі.
Сонымен қатар Израильден 68 қазақстандық эвакуацияланған.
Министрліктің мәліметінше, өңірдегі Қазақстанның дипломатиялық өкілдіктері жергілікті жерлерде жұмысты үйлестіруді жалғастырып, отандастармен тұрақты байланыс орнатқан және қажетті көмек көрсетіп жатыр.
Өткен сәрсенбі күні Сыртқы істер министрлігі Таяу Шығыс елдерінен 9 мың 517 қазақстандықтың шығарылғанын хабарлаған болатын.
