Астана. 13 наурыз. ИНТЕРФАКС-ҚАЗАҚСТАН – Қазақстанда отбасы мәселелері жөніндегі уәкіл болып, Президент жанындағы Әйелдер істері және отбасылық-демографиялық саясат жөніндегі ұлттық комиссия төрағасының орынбасары қызметіне Снежанна Имашева тағайындалды. Бұл туралы жұма күні мемлекет басшысының баспасөз қызметі хабарлады.
«Мемлекет басшысының өкімімен Имашева Снежанна Валерьевна Қазақстан Республикасында отбасы мәселелері жөніндегі уәкіл – Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия төрағасының орынбасары болып тағайындалды», – делінген хабарламада.
6 наурызда Халықаралық әйелдер күніне арналған салтанатты жиында президент Қасым-Жомарт Тоқаев жаңа қоғамдық лауазым – отбасы мәселелері жөніндегі уәкіл қызметі енгізілетінін мәлімдеген болатын. Президенттің айтуынша, бұл омбудсмен Ұлттық комиссия құрамында төрағаның орынбасары ретінде жұмыс істеп, өз қызметі туралы мемлекет басшысына тұрақты түрде есеп беріп отырады.
Тоқаевтың пікірінше, бұл қадам тұрмыстық зорлық-зомбылықтың алдын алу жүйесін күшейтуге және отбасы саясаты саласындағы басқа да маңызды мәселелерді кешенді түрде шешуге мүмкіндік береді.
Снежанна Имашева бұған дейін Парламент Мәжілісінің депутаты болған, палатаның Заңнама және сот-құқықтық реформа комитетін басқарған. 2024 жылғы қаңтарда ол Президент жанындағы Әйелдер істері және отбасылық-демографиялық саясат жөніндегі ұлттық комиссияның мүшесі атанды, ал сол жылдың сәуірінде Адам құқықтары жөніндегі комиссия құрамына кірді.
