Астана. 13 наурыз. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев банктер банкаралық QR-төлемдер сервисін (бірыңғай QR) енгізуді созып отырғанын мәлімдеді.
Жұма күні Digital Qazaqstan жобасын іске асыруға арналған жұмыс кеңесінде сөйлеген сөзінде ол өзінің тапсырмасы бойынша Ұлттық банк цифрлық қаржылық инфрақұрылымды қалыптастырғанын еске салды. Оның аясында банкаралық QR-төлемдер мен аударымдар, сондай-ақ цифрлық теңгемен есеп айырысу жүйесі іске қосылған.
«Бұл төлемдер тізбегіндегі делдалдар санын қысқарту арқылы шығындарды едәуір азайтады. Барлық банктердің осы инфрақұрылымға қосылуы заң жүзінде міндеттелген. Алайда ірі банктер бұл талапты орындауды созып отыр», – деді Тоқаев.
Бұған дейін Қазақстанда банкаралық QR-төлемдер сервисі (бірыңғай QR) 2026 жылдың бірінші тоқсанының соңында толық іске қосылатыны хабарланған болатын. Жүйе барлық банктердің оған қосылуын көздейді. Қазіргі уақытта сервиске «ЦентрКредит», Home Credit Bank, Freedom Bank, Халық банкі, Bank RBK және Altyn Bank қосылған.
Бірыңғай QR арқылы төлем жасау үшін сатып алушы сатушы терминалындағы QR-кодты өз банкінің мобильді қосымшасы арқылы сканерлеп, төлемді растауы қажет.
Қазақстанда банкаралық QR-төлемдерді енгізу бойынша пилоттық жоба 2024 жылдың қарашасында іске қосылған.
