Астана. 14 наурыз. ИНТЕРФАКС-ҚАЗАҚСТАН – Қазақстанда сенбі күні жаңа Конституция бойынша республикалық референдум алдындағы «тыныштық күні» басталды.
Бұл күні, сондай-ақ 15 наурызда – референдум өтетін күні кез келген үгіт-насихат жүргізуге тыйым салынады.
Қазақстанда жексенбі күні елдің жаңа Конституциясын қабылдау жөніндегі республикалық референдум өтеді. Тиісті жарлыққа президент Қасым-Жомарт Тоқаев 11 ақпанда қол қойған.
Дауыс беру үшін 10,4 мыңнан астам учаске ашылады, оның 71-і шетелде орналасқан. Барлығы 12 млн 586 мыңнан астам бюллетень дайындалған, олардың мәтіні қазақ және орыс тілдерінде басылған.
Референдум нәтижелері дауыс беру өткен күннен бастап жеті күннен кешіктірілмей, 21 наурызға дейін жарияланады.
Егер референдумда ел азаматтары қолдаса, Қазақстанның жаңа Конституциясы 2026 жылғы 1 шілдеден бастап күшіне енеді. Конституциядағы негізгі жаңалықтардың қатарында: вице-президент лауазымын енгізу; парламенттің бір палаталы болып өзгеріп, «Құрылтай» деп аталуы; оның 145 депутаттан тұрып, тек партиялық негізде сайлануы қарастырылған. Сонымен қатар Қазақстанда заң шығару бастамасы құқығына ие жоғары консультативтік орган – «Халық кеңесі» құрылады.
