Астана. 16 наурыз. ИНТЕРФАКС-ҚАЗАҚСТАН – Қазақстанда өткен референдум ел заңнамасына толық сәйкес ұйымдастырылды. Бұл туралы ТМД бақылаушылары миссиясының басшысы Игорь Петришенко мәлімдеді.
«ТМД бақылаушылары миссиясы 2026 жылғы 15 наурызда өткен референдум Қазақстан Республикасының заңнамасына толық сәйкес және жоғары ұйымдастырушылық деңгейде өткен деген қорытындыға келді. Мемлекеттік органдар мен референдум комиссиялары азаматтардың еркін түрде өз таңдауын білдіруіне барлық жағдай жасады», – деді Петришенко дүйсенбі күні Орталық сайлау комиссиясында өткен брифингте.
Ол Қазақстанның заңнамасы халықаралық құқықтың жалпыға танылған қағидаттары мен нормаларына сәйкес келетінін және бүкілхалықтық дауыс беруді еркін әрі демократиялық түрде өткізу үшін жеткілікті құқықтық негіз болып табылатынын атап өтті.
Миссияның пікірінше, орталық, аумақтық және учаскелік комиссиялар референдумды дайындау және өткізу үшін қажетті барлық шараларды қабылдап, жоғары ұйымдастырушылық деңгейде жұмыс жүргізген.
«Барлық деңгейдегі референдум комиссиялары, мемлекеттік органдар және бұқаралық ақпарат құралдары дауыс беруге дайындық пен оны өткізу барысын кеңінен жариялап отырды», – деді Петришенко.
Оның айтуынша, елде референдум туралы заңнаманың бұзылуына жедел әрекет ету және қабылданған шаралар туралы азаматтарды хабардар ету үшін қажетті жағдайлар жасалған. Шағымдар мен өтініштер Қазақстан заңнамасында белгіленген мерзімдер мен тәртіпке сәйкес қаралған.
«Дауыстарды санау рәсімі заңнама талаптарына сай жүргізілді. Бақылаушылар тіркеген жекелеген кемшіліктер техникалық сипатта болды және учаскелік комиссиялар тарапынан жедел түрде түзетілді. Референдум нәтижесіне әсер етуі мүмкін бұзушылықтар анықталған жоқ», – деді миссия басшысы.
ТМД бақылаушылары миссиясы 24 ақпаннан бастап референдумға дайындық барысын бақылаған. Миссия құрамында 161 бақылаушы жұмыс істеді. Референдум күні миссия өкілдері Қазақстанның 9 өңіріндегі 750-ден астам учаскеде болып, сондай-ақ шетелдегі дауыс беру учаскелерінде бақылау жүргізді.
