Астана. 16 наурыз. ИНТЕРФАКС-ҚАЗАҚСТАН – Қазақстанда жаңа Конституция бойынша өткен референдумдағы дауыс берудің алдын ала қорытындылары дүйсенбі күні сағат 11:00-де жарияланады. Бұл туралы Орталық референдум комиссиясы хабарлады.
«16 наурыз күні сағат 11:00-де Қазақстанның Орталық референдум комиссиясы 2026 жылғы 15 наурызда өткен республикалық референдумдағы дауыс берудің алдын ала нәтижелерін жариялайды», – делінген хабарламада.
Жиын аяқталғаннан кейін ТМД бақылаушылары миссиясының өкілдері, сондай-ақ референдумдағы дауыс беру барысын халықаралық деңгейде бақылаған шет мемлекеттердің орталық сайлау органдары делегацияларының басшылары сөз сөйлейді.
Қазақстанда өткен жексенбі күні жаңа Конституция бойынша республикалық референдум өтті.
Жаңа Конституцияның негізгі жаңалықтары қатарында: вице-президент лауазымын енгізу; Парламенттің бір палаталы болып, «Құрылтай» деп аталуы және 145 депутаттан тұруы; депутаттардың тек партиялық негізде сайлануы қарастырылған. Сонымен қатар Қазақстанда заң шығару бастамасы құқығына ие жоғары кеңесші орган – «Халық кеңесі» құрылады.
