Астана, 1 сәуір. ИНТЕРФАКС-ҚАЗАҚСТАН — Қазақстан Парламенті Мәжілісі сәрсенбі күні өткен жалпы отырыста «Қазақстан Республикасының арнайы мемлекеттік органдарының қызметі мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасын бірінші оқылымда мақұлдады.
Заң жобасын Парламент депутаттары бастамашылық еткен. Құжат ұлттық қауіпсіздікті қамтамасыз ету саласындағы заңнаманы одан әрі жетілдіруге бағытталғанын мәжіліс депутаты Болат Керімбек мәлімдеді.
Жоба аясында үш кодекс пен 11 заңға өзгерістер енгізу көзделген. Атап айтқанда, мемлекеттік құпияларды қорғау деңгейінің төмендеуі ұлттық қауіпсіздікке төнетін қауіптердің бірі ретінде заңнамалық деңгейде бекіту ұсынылады. Депутаттың айтуынша, бұл норма құпия ақпаратпен жұмыс істеу кезінде құқық бұзушылықтардың алдын алу, анықтау және жолын кесудің тиімді тетіктерін қалыптастыруға негіз болады.
Сондай-ақ құжатта арнайы мемлекеттік органдарға қызметке IT саласындағы мамандар мен дарынды жастарды тарту тетіктерін енгізу қарастырылған.
Бұдан бөлек, экстремизмнің пайда болуы мен таралуына ықпал ететін себептер мен жағдайларды анықтау, зерделеу және жоюға бағытталған шараларды күшейту ұсынылады.
Сонымен қатар заң жобасында экстремистік және террористік материалдарды сақтауға тыйым енгізу көзделген.
«Қолданыстағы заңнамада экстремистік және террористік материалдарды әкелуге, басып шығаруға, дайындауға және таратуға тыйым салынған. Осыған қоса, заң жобасы оларды сақтауға да тыйым енгізуді ұсынады», – деп түсіндірді Болат Керімбек.
Одан басқа, арнайы мемлекеттік органдардың жедел бөлімшелеріне қызметке қабылдау кезінде жас шектеуін алып тастау ұсынылады.
Мәжіліс сондай-ақ «Арнайы мемлекеттік органдардың қызметі мәселелері бойынша Әкімшілік құқық бұзушылық туралы кодекске өзгерістер мен толықтыру енгізу туралы» ілеспе заң жобасын да бірінші оқылымда мақұлдады.
Бұл құжат мемлекеттік құпияларды қорғау саласында заңдылықты қамтамасыз етуге, құқық бұзушылықтардың алдын алу мен жолын кесуге, сондай-ақ Мемлекеттік күзет қызметіне қосымша өкілеттіктер беруге бағытталған. Сонымен қатар мемлекеттік құпияларды қорғау талаптарын бұзғаны үшін, егер мұндай бұзушылық әкімшілік жаза қолданылғаннан кейін бір жыл ішінде қайта жасалса, жауапкершілік енгізу ұсынылады.
