Астана. 1 сәуір. ИНТЕРФАКС-ҚАЗАҚСТАН — Қазақстан Парламенті Мәжілісі сәрсенбі күні өткен жалпы отырыста Қазақстан мен Халықаралық валюта қоры арасындағы Кавказ, Орталық Азия және Моңғолия үшін әлеуетті дамыту жөніндегі өңірлік орталыққа қатысты өзара түсіністік туралы меморандумды ратификациялау туралы заңды қабылдады.
Аталған меморандум 2024 жылғы қазанда Вашингтон қаласында қол қойылып, Алматы қаласында орналасқан өңірлік әлеуетті дамыту орталығының қызметін реттейді.
Жиында Тимур Сүлейменов атап өткендей, ХВҚ орталығын Қазақстанда орналастыру елдің әлеуметтік-экономикалық дамуына ықпал етіп, экономикалық саясат саласындағы ұлттық және институционалдық әлеуетті нығайтады.
«Қазақстан үшін ХВҚ орталығы — тек консультациялар мен семинарлар өткізу алаңы ғана емес, сонымен қатар стратегиялық маңызы бар ресурс», – деді ол. Сондай-ақ орталықтың қызметі іскерлік және білім беру туризмінің, сондай-ақ соған байланысты қызметтердің дамуына серпін беретінін атап өтті.
Орталық 2021 жылғы 1 ақпанда онлайн форматта жұмысын бастап, ресми ашылуы 2023 жылғы маусымда өтті. Қазіргі уақытта ол Қазақстан, Армения, Әзербайжан, Грузия, Қырғызстан, Моңғолия, Тәжікстан, Түрікменстан және Өзбекстанның мемлекеттік қызметшілеріне макроэкономика, ақша-кредит және бюджет саясаты, қаржылық реттеу мен қадағалау, сондай-ақ макроэкономикалық статистика салаларында білім мен тәжірибе алмасуға мүмкіндік береді.
Тимур Сүлейменовтің мәліметінше, бүгінгі таңда орталық шамамен 615 іс-шара өткізіп, 4,6 мың адамды оқытқан. Оның ішінде 1,3 мыңы — Қазақстан азаматтары.
Меморандумға сәйкес, орталық директорының жалақысы, әлеуметтік кепілдіктері мен тұрғын үй шығындарын ХВҚ өтейді. Қалған шығындар бенефициар елдер мен донор серіктестердің қаржылық жарналары есебінен жабылады.
Заң жобасы Сенаттың қарауына жолданды.
