Астана. 11 сәуір. Интерфакс-Қазақстан – Қазақстан Президенті Қасым-Жомарт Тоқаев Өзбекстан ұсынған «Таза ауа» бастамасын қолдап, оны екі елдің бірлесіп жүзеге асыруын ұсынды.
«Таза ауаға қатысты бастамаңызды ерекше атап өткім келеді. Ташкенттің экологиялық жағдайына байланысты алаңдаушылығыңызды толық түсінемін. Алматыда да жағдай өте күрделі. Қала, өкінішке қарай, әлемдегі ең ластанған ірі мегаполистердің қатарына енді. Сондықтан шұғыл шаралар қажет. Егер қарсы болмасаңыз, бүгін осы бастаманы екі ел үкіметтері жүзеге асыратын, президенттердің қамқорлығындағы бірлескен жоба ретінде ұсынар едік», – деді Тоқаев Бұхара қаласында Шавкат Мирзиёевпен бейресми кездесу барысында.
Оның айтуынша, бұл бастама қоғам тарапынан да, халықаралық деңгейде де қолдау табуы мүмкін.
«Осы бастама аясында ауқымды жұмыстар атқаруға болады. Бұл жергілікті билік пен кәсіпкерлердің экология мен табиғатты қорғау мәселесіне жауапкершілігін арттырады», – деді Президент.
Тоқаев сондай-ақ Өзбекстан билігінің тарихи-мәдени мұраны сақтау бағытындағы жұмысын жоғары бағалады.
«Біз бүгін жол-жөнекей заманауи Бұхараны көрдік. Қалада ауқымды жаңғырту жұмыстары жүргізілген. Бұл – үлкен еңбектің және ең бастысы, осындай ұлы тарихи мұраға деген мемлекеттік қамқорлықтың нәтижесі», – деді ол.
Президенттің атап өтуінше, 2,5 мың жылдан астам тарихы бар Бұхара ортағасырлық Шығыстың рухани әрі зияткерлік орталықтарының бірі саналады.
«Бұл жерде уақыт тынысы мен адамзат өркениетінің ұлылығы айқын сезіледі. Қазіргі кезеңде Бұхара мыңжылдық дәстүрлер мен жаңа Өзбекстанның серпінді дамуын үйлесімді түрде ұштастырып отыр», – деді Тоқаев.
