KazTAG хабарлайды: «2026 жылы 1 шілдеден бастап Ресейге жұмыс істеуге немесе оқуға баратын қазақстандықтар «Госуслуги RuID» мобильді қосымшасын пайдалануға міндеттеледі. Бұл туралы Қазақстанның Санкт-Петербургтегі бас консулдығының баспасөз қызметі мәлімдеді. «2026 жылы 1 шілдеден бастап Ресей Федерациясының аумағына жұмыс істеу немесе білім алу мақсатында келетін Қазақстан Республикасының азаматтары үшін «Госуслуги RuID» мобильді қосымшасын пайдалану міндетті болып енгізіледі. Шетелдік азаматтар «RuID» қосымшасында дербес профиль ашуға және шекарадан өту жоспарланған уақытқа дейін 72 сағаттан кешіктірмей Ресей Федерациясына келу туралы электронды өтініш беруге міндетті. Өтінішті қарау нәтижесі бойынша қосымшада жеке QR-код қалыптасады, ол елге кіру құқығын растайтын құжат болып табылады», — делінген сейсенбідегі хабарламада. Қалыптасқан QR-код өтініш берілген күннен бастап 90 күн ішінде жарамды болады».
Еуразия24 пікірі:
Идеяның өзі жаңа бір дүние емес — елге кіруге арналған цифрлық алдын ала рұқсат көптеген мемлекеттерде қолданылады. Еуропалық Одақ елдерінде ETIAS жүйесі (сапар алдында алдын ала тіркелу) енгізілуде, АҚШ-та ESTA жүйесі жұмыс істейді, сондай-ақ ұқсас тетіктер Канада, Аустралия және Азияның бірқатар елдерінде бар. Бірақ Ресейдегі шекарадан өту алдындағы рұқсат алу талаптарының жүзеге асырылуында өзіндік «ерекшеліктер» бар. Әлемдік тәжірибеде мұндай тіркеу бір ғана құралмен шектелмейді. Интернеттің қарыштап дамыған заманында келушілерге өтінішті сайт арқылы, турагенттіктер көмегімен, тіпті кейде тікелей шекарада беру мүмкіндігі қарастырылады. Ал ресейлік нұсқада бәрі тек мемлекеттік қызметтер қосымшасы арқылы жүзеге асуы тиіс. Ресей бағытындағы адам ағынының өте көптігін ескерсек, қосымшаның істен шығуы, авторизация кезіндегі қателіктер немесе интернетке қатысты қиындықтар туындау қаупі жоғары. Соның салдарынан қолында билеті бар адамның, кіруге 72 сағат қалғанда қатаң түрде алуы тиіс QR-коды болмаса, шекарадан өте алмай қалуы әбден мүмкін. Ең қызығы, «еуразияшылдық» өзін адамдардың еркін қозғалысына арналған аймақ деп жариялағанымен, ЕАЭО-ға мүше елдердің азаматтары үшін ешқандай жеңілдік қарастырылмаған. 1 шілдеге дейін әлі уақыт бар, бұл мәселенің туғызған резонансын ескере отырып, қандай да бір өзгерістер енгізілуі де ғажап емес.
