Астана. 15 сәуір. ИНТЕРФАКС-ҚАЗАҚСТАН – Қазақстанда ұлттық рейтинг агенттігін құру жоспарланып отыр, оның акционерлерінің қатарында халықаралық рейтинг агенттіктерінің «үлкен үштігіне» кіретін ұйымдардың бірі болуы мүмкін. Бұл туралы Қаржы нарығын реттеу және дамыту агенттігінің төрайымы Мадина Әбілқасымова мәлімдеді.
Оның айтуынша, «Рейтингтік қызмет туралы» заң жобасында нарықтың институционалдық моделі енгізіліп, кредиттік рейтинг агенттіктерінің үш түрі қарастырылған. Соның ішінде ұлттық рейтингтік бағалау жүргізетін тәуелсіз институт ретінде қазақстандық рейтинг агенттігін құру көзделіп отыр.
Әбілқасымованың сөзінше, жаңа агенттіктің акционерлері ретінде Ұлттық банк, халықаралық рейтинг агенттігі және қаржы ұйымдары қатыса алады.
«Негізгі акционер ретінде Ұлттық банк қарастырылып отыр. Бұл инвесторлар сеніміне ие болатын тұрақты институт қалыптастыру үшін қажет. Сонымен қатар халықаралық әдіснаманы енгізу маңызды, осыған байланысты халықаралық рейтинг агенттігін акционер ретінде тарту жоспарлануда», – деді ол.
Оның мәліметінше, қазіргі уақытта Ұлттық банк Standard & Poor’s, Moody’s және Fitch Ratings сияқты «үлкен үштік» рейтинг агенттіктерімен, сондай-ақ басқа да шетелдік ұйымдармен келіссөздер жүргізіп жатыр. Мақсат – олардың әдіснамасын пайдалану және қазақстандық агенттікті құруға тікелей қатыстыру.
Ұлттық рейтинг агенттігі үшін заңға тәуелді актілер деңгейінде жарғылық және меншікті капиталдың ең төменгі мөлшеріне қатысты талаптар белгіленеді. Бұл шамамен 10 млрд теңгені құрайды және басқа елдердегі ұлттық рейтинг агенттіктерінің тәжірибесіне сәйкес келеді.
Қазақстанда кредиттік рейтинг агенттігін құру жоспары алғаш рет 2023 жылы жарияланған болатын.
