Астана. 15 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев БҰҰ Бас хатшысының су ресурстары жөніндегі арнайы өкілі Ретно Марсудины қабылдады. Бұл туралы сәрсенбі күні Мемлекет басшысының баспасөз қызметі хабарлады.
«Кездесу барысында жаһандық және өңірлік су мәселелеріне қатысты негізгі тақырыптар талқыланды», – делінген хабарламада.
Тоқаев су ресурстары Қазақстан үшін стратегиялық маңызы бар екенін атап өтті. Оның айтуынша, бұл мәселе тұрақты даму, экологиялық қауіпсіздік және өңірлік тұрақтылықпен тікелей байланысты. Сондай-ақ ол су саласындағы халықаралық ынтымақтастықтың тиімді жүйесін қалыптастырудың маңызын ерекше атап өтті.
Осы тұрғыда Президент БҰҰ аясында Халықаралық су ұйымын құру жөніндегі бастамасына тоқталды. Оның пікірінше, бұл қадам су ресурстарын ұтымды пайдалану, халықаралық үйлестіруді күшейту және су мәселелеріне қатысты тұрақты шешімдерді ілгерілету бағытындағы жаһандық күш-жігерге серпін береді.
Баспасөз қызметінің мәліметінше, Астанада өтетін өңірлік экологиялық саммит аясында аталған бастамаға қатысты халықаралық консультациялардың алғашқы кезеңін бастау жоспарланып отыр.
Кездесуде сондай-ақ 2026 жылдың желтоқсанында Абу-Дабиде өтетін БҰҰ-ның су ресурстары жөніндегі конференциясының маңызы атап өтілді. Бұл алаң су мәселелерін шешу бойынша келісілген тәсілдерді қалыптастыруға мүмкіндік береді.
Тараптар Орталық Азия өңірінде су ресурстарын тиімді пайдалану мәселелеріне де ерекше назар аударды.
