Астана. 22 сәуір. ИНТЕРФАКС-ҚАЗАҚСТАН – Қазақстан сирек кездесетін жануарлар түрлерін сақтау қорына халықаралық серіктестерді қосылуға шақырады. Бұл туралы ел Президенті Қасым-Жомарт Тоқаев мәлімдеді.
«Қазақстан барлық серіктестерді сирек түрлерді және биоалуантүрлілікті сақтау қорына қосылуға шақырады. Бұл – трансшекаралық ынтымақтастықты, ғылыми зерттеулерді дамытуға және экожүйелерді тиімді қорғауға арналған алаң», – деді Тоқаев Астанада өткен Өңірлік экологиялық саммит-2026 барысында сөйлеген сөзінде.
Президент биоалуантүрлілікті сақтау Қазақстанның экологиялық саясатының негізгі бағыттарының бірі екенін атап өтті.
«Жүйелі шаралардың нәтижесінде нақты жетістіктерге қол жеткізілді: ақбөкендер популяциясы қалпына келтірілді. Қазақстандағы қар барысы саны екі еседен астам өсіп, қазіргі уақытта шамамен 190 дараны құрайды», – деп қосты ол.
Сондай-ақ Президент халықаралық серіктестермен бірлесіп, Қазақстан сирек кездесетін өзге де жануарлар түрлерін қайта жерсіндіру және қалпына келтіру жұмыстарын жүргізіп жатқанын еске салды. Олардың қатарында сұңқарлар, Тұран жолбарысы және Пржевальский жылқысы бар.
