Астана. 22 сәуір. ИНТЕРФАКС-ҚАЗАҚСТАН – Мәжіліс сәрсенбі күнгі жалпы отырыста «Қазақстан Республикасындағы жергілікті мемлекеттік басқару және өзін-өзі басқару туралы» заңға өзгерістер мен толықтырулар енгізу жөніндегі заң жобасын бірінші оқылымда мақұлдады.
Құжат депутаттардың бастамасымен әзірленген. Оның мақсаты – өңірлердің мүмкіндігін арттырып, жергілікті өзін-өзі басқару органдарының рөлін күшейту. Бұл туралы Мәжіліс депутаты Екатерина Смышляева мәлімдеді.
Заң жобасында аумақтық кеңестердің қалай құрылатыны мен олардың міндеттері нақтыланған. Бұған дейін бұл бағыттағы нормалар толық іске аспай келген. Енді ірі ауылдар мен қалалардың тұрғындары жергілікті басқару ісіне белсендірек қатыса алады.
Сонымен қатар мәслихаттардың құзыреті кеңейеді. Депутаттарға бюджетке өзгеріс енгізуді ұсыну, бюджеттік комиссия жұмысына қатысу құқығы беріледі. Бұдан бөлек, коммуналдық нысандарды басқаруға мәслихаттардың қатысуы күшейтіледі.
«Сондай-ақ мәслихат депутаттарының әлеуметтік кепілдіктері де артады. Атап айтқанда, іссапар шығындары өтеледі. Егер мәслихат таратылған жағдайда, тұрақты негізде жұмыс істейтін депутаттарға тиісті төлемдер қарастырылған», – деді Смышляева.
Құжатта өңірлердің қаржылық дербестігін арттыруға бағытталған өзгерістер де бар. Жергілікті бюджеттер қосымша үш түрлі төлемдер мен айыппұлдар есебінен толықтырылады. Бұл жергілікті билік органдарына қаржыны өз бетінше бөлуге және шешім қабылдауға көбірек мүмкіндік береді.
