Астана. 22 сәуір. ИНТЕРФАКС-ҚАЗАҚСТАН – Мәжіліс сәрсенбі күнгі жалпы отырыста «Еуразиялық экономикалық одақ пен үшінші тарап (тараптар) арасындағы бірыңғай кедендік транзит жүйесі туралы келісімді ратификациялау туралы» заңды қабылдады.
Келісім 2024 жылы 26 желтоқсанда Санкт-Петербург қаласында жасалған. Құжат Еуразиялық экономикалық одақтың кедендік шекарасы және үшінші елдердің шекаралары арқылы тауарларды тасымалдау үшін қолайлы жағдай қалыптастыру мақсатында бірыңғай кедендік транзит жүйесін құруды көздейді. Бұл туралы Мәжілістің қаржы және бюджет комитетінің қорытындысында айтылған.
Аталған жүйе бірнеше негізгі тетіктерді қамтиды: транзиттік декларацияны электрондық форматта бірыңғай үлгіде қолдану; кедендік баждар мен салықтарды төлеу міндеттемелерін қамтамасыз етудің ортақ тәртібі; жүк қозғалысын бүкіл маршрут бойы бақылауға мүмкіндік беретін навигациялық пломбаларды пайдалану; сондай-ақ кеден органдары қабылдаған шешімдерді өзара тану.
Бұл жүйе кедендік рәсімдерді біріздендіріп, жеңілдетуге, транзиттік жүк тасымалына байланысты бизнестің уақыт және қаржылық шығындарын азайтуға, сондай-ақ кедендік операциялар кезінде ақпарат алмасуды жеделдетуге мүмкіндік береді.
Заң Сенаттың қарауына жолданды.
