Астана. 21 қазан. ИНТЕРФАКС-ҚАЗАҚСТАН – Қазақстан Республикасының Ұлттық қауіпсіздік комитеті (ҰҚК) құны 45 млрд теңге болатын 160 мың тоннадан астам мұнай өнімін шетелге заңсыз шығарған ұйымдасқан қылмыстық топтың әрекетін тоқтатты. Бұл туралы сәрсенбі күні ведомствоның баспасөз қызметі хабарлады.
«Ұлттық қауіпсіздік комитеті Қазақстан Республикасының аумағынан мұнай өнімдерін заңсыз экспорттаумен айналысқан ұйымдасқан қылмыстық топтың әрекетіне тосқауыл қойды», – делінген ҰҚК хабарламасында.
Тергеу мәліметінше, қылмыстық схеманы Маңғыстау облысының кәсіпкері ұйымдастырған. Ол жер қойнауын пайдаланушы компаниялармен шикі мұнай сатып алу жөнінде келісімшарттар жасасқан. Кейін мұнай Standart Petroleum және Mangystau Oil Refining шағын мұнай өңдеу зауыттарында өңделіп, дайын өнімге жалған сапа паспорттары рәсімделген.
Осыдан кейін мұнай өнімдері пеш отыны ретінде көрсетіліп, Ақтау теңіз порты арқылы танкермен шетелге жөнелтілген.
«2019–2023 жылдар аралығында тек Batys Nefte Trade ЖШС арқылы 160 мың тоннадан астам мұнай өнімі шетелге заңсыз шығарылған. Жүргізілген операциялардың жалпы құны шамамен 45 млрд теңгеге бағаланып отыр», – деп хабарлады ведомство.
ҰҚК мәліметінше, биыл қылмыстық іс аясында жүргізілген процестік шаралардың нәтижесінде іске қатысы бар адамдардың активтері, сондай-ақ шағын мұнай өңдеу зауыттары, танкер және өзге де мүлкі тәркіленген. Жалпы, заңсыз алынған табыс пен төленбеген салық есебінен мемлекет кірісіне 2 млрд теңгеден астам қаражат өндірілген.
Бұған дейін Ақтау қалалық сотының үкімімен ұйымдасқан қылмыстық топтың бес мүшесі, соның ішінде шағын мұнай өңдеу зауыттары мен мұнай өнімдерін сатумен айналысқан компанияның басшылары сегіз жылға бас бостандығынан айырылған. Олар Қылмыстық кодекстің 234-бабының 3-бөлігі (экономикалық контрабанда) және 262-бабының 2-бөлігі (ұйымдасқан топты, қылмыстық ұйымды құру және оған басшылық ету, сол сияқты оларға қатысу) бойынша кінәлі деп танылған.
ҰҚК қылмыстық схеманы ұйымдастырған адамға халықаралық іздеу жарияланғанын нақтылады.
21 қазандағы ресми валюта бағамы – 1 АҚШ доллары үшін 450,69 теңге.
