Қостанай облысында қазақ киносының онкүндігі басталды. Өңір көрермендеріне Қазақстан Республикасының Мәдениет және ақпарат министрлігі тапсырысымен және Ұлттық киноны қолдау мемлекеттік орталығы қолдауымен түсірілген фильмдер ұсынылады. Өңірдегі кино күндері Қостанай облысының әкімдігі көмегімен ұйымдастырылуда. Ашылу күні «Qaitadan» фильмі көрсетілді — бұл туынды қазақстандық кинематография тарихында рекорд орнатып, мемлекеттің қолдауыменен түсірілген және прокатта 1 миллиард теңгеден астам табыс жинаған алғашқы ұлттық жоба болды. Көрсетілімге Ұлттық киноны қолдау мемлекеттік орталығы басшылығы, облыс әкімдігі өкілдері, сондай-ақ фильмнің шығармашылық тобы — режиссер Думан Еркімбек, продюсер Жалын Тлеуберген және басты рөлді сомдаған Жасұлан Көпберген қатысты. Ұлттық киноны қолдау мемлекеттік орталығы басқарма төрағасының орынбасары Әділет Омаров былай деп атап өтті: «Кино күндері елімізде дәстүрлі сипатқа ие болып келеді. Екінші жыл қатарынан өңірлердегі кинотеатрлар ұлттық кино өнерін бағалайтын көрермендерді көптеп жинауда. Әсіресе, фильмдеріміздің ауылдық жерлерде де қызығушылықпен көрсетіліп жатқаны қуантады. Өйткені кино — елдің әрбір көрерменіне тиесілі құндылық, ол баршаға қолжетімді болуы тиіс. Кино күндері аясында ұсынылатын әрбір туынды өзіндік мазмұнға ие және көрерменді терең ойға жетелей алады. Бағдарламада балаларға арналған жобалар да бар. Жыл соңына дейін кино күндері республиканың барлық өңірлерін қамтиды».
Еуразия24 пікірі:
«Qaitadan» туындысын соңғы жылдардағы ең әсерлі ұлттық фильмдердің бірі деп атауға болады.
Бұл туындыны Қазақстанның барлық жасөспірімдеріне көру ұсынылады, себебі кино дәл солар туралы: өмірдің күтпеген бұрылыстары мен өз іс-әрекетіңді уақтылы қайта саралаудың маңыздылығын баяндайды. Прокаттағы миллиардтық кассалық жиын — нақты көрермендердің жүздеген мың дауысының айқын көрсеткіші. Кино күндерінің ашылуына картинаның жарыққа шығуына тікелей үлес қосқан тұлғалардың — режиссердің, продюсердің және басты рөлдегі актердің қатысуы ерекше маңызға ие болды. Өңірлердің мәдени тынысында мұндай іс-шаралар көбірек болуы тиіс. Жастарды дәстүрлі құндылықтарға әлеуметтік желілер емес, төл ұлттық қаһармандарымыз баулуы қажет. Отандық кинематографтың сапалық жағынан айтарлықтай өскенін ерекше атап өту керек. Бұл шетелдік киноконтентті көрермен қызығушылығына нұқсан келтірмейтін лайықты баламамен алмастыруға мүмкіндік береді. Қазақстандық кино өнері тіпті қиырдағы ауылдарға дейін жетіп, әр шаңыраққа енуі арқылы жай ғана ойын-сауық болудан қалып, ортақ мәдени кодқа айналуда.
