Астана. 25 сәуір. «Интерфакс-Қазақстан» — Қазақстан Президенті Қасым-Жомарт Тоқаев экологиялық мәдениетті қалыптастыруда білім беру жүйесіне ерекше мән беру қажет екенін мәлімдеді.
«Балалар мектептен бастап табиғатты қорғауды және еңбекті бағалауды үйренуі тиіс. Оқушылар мен студенттерді экологиялық акцияларға кеңінен тарту қажет. Осыған байланысты Оқу-ағарту министрлігіне «Жасыл сабақтар» жобасын әзірлеп, енгізуді тапсырамын», — деді Президент «Таза Қазақстан» республикалық экологиялық акциясы барысында.
Мемлекет басшысы білім беру ұйымдарында табиғи ресурстарды ұтымды пайдалану және қоршаған ортаны қорғау қағидаттарын жүйелі түрде қалыптастыру маңызды екенін атап өтті.
Сонымен қатар, ол оқушылар мен студенттердің экологиялық жобалары мен ғылыми зерттеулерін жан-жақты қолдау қажеттігін айтты.
Президенттің пікірінше, «Таза Қазақстан» бастамасы ұлттық идея деңгейіне көтерілуі тиіс.
«Бұл бастама қоғамды сапалы түрде өзгертуге бағытталуы керек. Оны азаматтардың санасына терең сіңіру үшін мәдениет саласының, әсіресе креативті индустрияның әлеуетін толық пайдалану қажет. Еңбекқорлық, табандылық, әділдік және шығармашылық сияқты құндылықтарды фильмдер мен сериалдар арқылы насихаттау керек. Бұл бағытта бұқаралық ақпарат құралдары мен әлеуметтік желілердің мүмкіндіктерін тиімді қолдану маңызды», — деді Қасым-Жомарт Тоқаев.
