Астана. 24 сәуір. «Интерфакс-Қазақстан» — Қазақстанға жақын жылдары жасанды интеллект және deeptech технологиялары саласында қосымша 100 мың маман даярлау қажет. Бұл туралы Президент Қасым-Жомарт Тоқаев мәлімдеді.
«Қазіргі таңда Al Sana бағдарламасы бойынша 650 мыңнан астам студент білім алып жатыр. Ал алдағы кезеңде жасанды интеллект және deeptech технологиялары бағытында тағы 100 мың маман даярлау қажет», — деді Тоқаев Alem.ai battle және AI Governance Cup байқауларының жеңімпаздарын марапаттау рәсімінде.
Мемлекет басшысы сондай-ақ жақын уақытта елдің цифрлық дамуының негізгі бағытын айқындайтын Digital Qazaqstan стратегиясы бекітілетінін хабарлады.
Президент Қазақстанда суперкомпьютерлік кластер іске қосылғанын атап өтіп, деректерді өңдеу орталықтарының («Долина ЦОД») экожүйесін қалыптастыру қажеттігін айтты.
«Бұл ауқымды жоба жаңа инвестициялар тартуға және еліміздің өңірлік цифрлық хаб ретіндегі позициясын күшейтуге мүмкіндік береді», — деді ол.
Сонымен қатар Тоқаев күзде Қазақстанда креативті индустрияны дамытуға арналған Astana AI Film Festival халықаралық іс-шарасы өтетінін еске салды.
«Бұл фестиваль елімізді халықаралық деңгейде инновациялар мен жаңа бастамалардың орталығы ретінде таныту үшін маңызды», — деп атап өтті Президент.
Мемлекет басшысы Қазақстанда Жасанды интеллект университетін ашу жоспарланып отырғанына да тоқталды.
«Біздің негізгі міндетіміз — осы салаға қажетті білікті мамандарды даярлау. Дарынды жастарды тарту және оларға сапалы білім алу үшін жағдай жасау маңызды. Сонымен қатар перспективалы технологиялық жобалар мен компанияларды қолдау қажет. Бұл бағыттағы жүйелі жұмыс елдің дамуына жаңа серпін береді», — деп түйіндеді Қасым-Жомарт Тоқаев.
