Астана. 30 сәуір. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күнгі жалпы отырыста Мәжіліс бұрын қабылдаған «Мемлекеттік қызмет туралы» заңды және оған ілеспе түзетулерді мақұлдады.
Осылайша, заңдар Парламент тарапынан тұтастай қабылданды деп есептеліп, мемлекет басшысының қол қоюына жіберіледі.
Бұған дейін Мемлекеттік қызмет істері агенттігінің төрағасы Дархан Жазықбай заңда мемлекеттік қызметтің тартымдылығын арттыру, білікті кадрларды тарту және ұстап қалу үшін бірқатар шаралар қарастырылғанын мәлімдеген.
Атап айтқанда, құжат бір лауазым шеңберінде кәсіби дамуды реттейді және еңбекақыны кемінде үш жылда бір рет міндетті индексациялауды көздейді.
Мемлекеттік қызметшілердің әлеуметтік қорғалуы мәселесіне ерекше назар аударылған. Демалыс және мереке күндері жұмысқа тартылған жағдайда міндетті өтемақы төлеу, еңбек өтіліне қарай қосымша демалыс күндерін беру қарастырылған. Еңбек өтілі кемінде 25 жыл болған жағдайда зейнетке шыққанда төрт лауазымдық айлықақы мөлшерінде біржолғы төлем жасау көзделеді.
Сондай-ақ мемлекеттік қызметшінің жұмыс уақытының тәртібі айқындалған: күнделікті жұмыс ұзақтығы сегіз сағатқа дейін белгіленеді. Бірінші және екінші топтағы мүгедектігі бар қызметшілер үшін жұмыс уақыты аптасына 36 сағаттан аспайтын қысқартылған режимде белгіленеді.
Жазбаша өтініш негізінде жүкті әйелдерге, үш жасқа дейінгі баласы бар ата-аналардың біріне, сондай-ақ медициналық қорытындыға сәйкес науқас отбасы мүшесіне күтім жасайтын мемлекеттік қызметшілерге толық емес жұмыс уақыты режимі белгіленеді.
Сонымен қатар мемлекеттік қызметшілерге қойылатын негізгі талаптар ретінде қазақстандық патриотизм, кәсібилік, ашықтық, әдептілік пен мінсіз бедел, сондай-ақ құқық бұзушылықтарға және мүдделер қақтығысына төзбеушілік айқындалған.
Депутаттар әскери қызметке шақырылған мемлекеттік қызметшілерге берілетін кепілдіктерді де заңнамалық түрде бекітті. Атап айтқанда, әскери қызмет өткеру кезеңінде олардың лауазымы сақтала отырып, жалақысы сақталмайтын демалыс беру қарастырылған.
Сенат депутаттары мемлекеттік қызмет мәселелері бойынша ілеспе заңнамалық түзетулерді де екі оқылымда қарап, мақұлдады. Атап айтқанда, Еңбек кодексіне, «Халық денсаулығы және денсаулық сақтау жүйесі туралы» кодекске және бірқатар заңдарға өзгерістер енгізіледі.
Түзетулер мемлекеттік қызметшілерді есірткі құралдарын, психотроптық заттарды және олардың аналогтарын қолдану тұрғысынан медициналық куәландырудан өткізу тәртібі мен негіздерін, сондай-ақ мұндай тексеруден өтетін лауазымдар тізбесін айқындайды.
