Астана. 4 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаевқа Алматыға сапары барысында қорғаныс және қауіпсіздік саласындағы инновацияларды қолдау бойынша Defense Tech орталығы таныстырылды. Бұл туралы Мемлекет басшысының баспасөз қызметі хабарлады.
Қорғаныс министрлігі жүзеге асырып жатқан Defense Tech жобасы Қарулы Күштер мен ұлттық қауіпсіздік жүйесінің қажеттіліктері үшін отандық технологиялық шешімдерді анықтау, іріктеу және жеделдетіп дамыту бойынша инновациялық экожүйені қалыптастыруға бағытталған, делінген хабарламада.
«Бастаманы дамыту аясында Алматыда Defense Tech IT Park қорғаныс технологиялары орталығы – Армия үйінің базасында мультифункционалды инновациялық хаб ашылды. Мұнда отандық IT-компаниялар мен стартап-командалар әзірлеген қорғаныс және қауіпсіздік саласындағы озық технологиялық шешімдер мен перспективалы жобалар ұсынылған», — деп атап өтілді хабарламада.
Жоба шеңберінде инновациялық командалармен және ғылыми-техникалық ұйымдармен жұмыс істеудің тұрақты механизмі құрылуда.
Астанада Astana Hub алаңында Defense Tech үйлестіру кеңсесі ұйымдастырылды. Ол Қорғаныс министрлігі, технологиялық кәсіпкерлер, ғылыми ұйымдар және индустриялық серіктестер арасындағы тұрақты байланысты қамтамасыз етеді.
