Астана. 6 мамыр. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні өткен жалпы отырыста «Топырақты қорғау туралы» заң жобасын бірінші оқылымда мақұлдады.
Заң жобасын депутаттар тобы әзірлеген. Ол топырақты тиімді басқару мен қорғаудың, оның құнарлылығын сақтау мен арттырудың, сондай-ақ жердің тозуына жол бермеудің құқықтық негіздерін қалыптастыруға бағытталған. Бұл туралы отырыста Мәжіліс депутаты Нұржан Әшімбетов мәлімдеді.
Құжат «топырақ» ұғымын бекітеді, оны ұтымды пайдаланудың негізгі талаптарын белгілейді, мемлекеттік органдардың топырақты қорғау саласындағы функцияларын нақтылайды және жүргізілетін ғылыми зерттеулердің нақты бағыттарын айқындайды.
Депутаттың айтуынша, заң жобасында топырақты су басудан, батпақтанудан, қайталап тұзданудан, құнарсызданудан, кеуіп кетуден және тығыздалудан қорғау, сондай-ақ тозған топырақты қалпына келтіру бойынша талаптарды белгілеу ұсынылады.
Атап айтқанда, жер пайдаланушылар су, тұз, қоректік және жылу режимдерін реттеу, ағынды және артық суды бұру, ылғалдылықтың оңтайлы деңгейін сақтау бойынша іс-шаралар жүргізуге, қар тоқтату әдістерін қолдануға, сондай-ақ топыраққа барынша аз әсер ететін ауыл шаруашылығы техникасын пайдалануға міндеттеледі.
Сонымен қатар Мәжіліс топырақты қорғау мәселелері бойынша заңнамалық актілерге енгізілетін ілеспе түзетулерді де бірінші оқылымда мақұлдады. Түзетулер ұғымдық аппаратты нақтылауға және заң жобасының нормаларын қолданыстағы заңнамаға сәйкес келтіруге бағытталған редакциялық сипаттағы өзгерістерді қамтиды.
