Астана. 6 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев елдің қорғаныс әлеуетін арттыруды жалғастыру және Қарулы Күштерді техникалық жаңғырту қажет деп санайды. Мемлекет басшысы екі жыл ішінде армияны реформалауды тапсырды.
«Еліміз түрлі сын-қатерлердің алдын алуға және кез келген қауіпке тойтарыс беруге дайын болуға тиіс. Сондықтан бізге қорғаныс әлеуетін нығайтып, ең алдымен, Қарулы Күштерді технологиялық тұрғыдан жаңғыртуды жалғастыру қажет», — деді Тоқаев сәрсенбі күні мемлекеттік наградалар мен әскери атақтарды тапсыру рәсімінде.
Президенттің сөйлеген сөзін оның баспасөз қызметі таратты.
«Бұл — қазіргі құбылмалы әрі тұрақсыз кезеңнің талабы. Осыны ескере отырып, ең алдымен, Қарулы Күштеріміз бен әскерилендірілген құрылымдарымызда терең реформалар жүргізу қажет», — деп атап өтті Мемлекет басшысы.
Қасым-Жомарт Тоқаевтың айтуынша, бұл міндетті «қысқа мерзімде — екі жыл ішінде шешу керек».
