Atameken Business хабарлауынша, Қазақстанда ипотекаға сұраныс 21%-ға төмендеген. Бұл туралы Ұлттық банктің сауалнамасында айтылған. ҚР Ұлттық банкінің Қаржылық тұрақтылық және зерттеулер департаментінің директоры Олжас Кубенбаевтың мәліметінше, бірінші тоқсанда ипотекалық несиеге берілген өтінімдер саны 21%-ға азайып, 191 мыңды құраған. Автонесиеге сұраныс та 20%-ға төмендеп, 1,2 млн өтінімге дейін қысқарған. Кепілсіз несиелерге сұраныс 2%-ға төмендеп, 16,1 млн өтінім болған. Дегенмен мұндай қарыздардың орташа көлемі 963 мың теңгеге дейін өскен. Ипотекалық несиелеудің төмендеуіне пайыздық мөлшерлемелердің өсуі мен тұрғын үй құрылысы көлемінің қысқаруы әсер еткен. Ал автонесиелеу нарығындағы баяулау жаңа көліктер бағасының төмендеуі аясында субсидияланатын бағдарламаларға қызығушылықтың азаюымен байланыстырылады. Ірі бизнес тарапынан берілген өтінімдер саны 16%-ға артып, 238-ге жеткен. Сонымен қатар олардың орташа көлемі 80%-ға өсіп, 18,8 млрд теңгені құраған. Ал шағын бизнес субъектілері берген өтінімдер саны 5%-ға азайып, 912 мың болған. Орташа несие көлемі 11%-ға төмендеп, 24,8 млн теңгені құрады. Несие мақұлдау деңгейі ірі бизнес сегментінде 10 пайыздық тармаққа төмендеп, 55% болған. Орта бизнес бойынша бұл көрсеткіш 4 пайыздық тармаққа азайып, 37%-ды құрады. Шағын бизнесте 2 пайыздық тармаққа төмендеп, 34% деңгейінде қалыптасты. Екінші тоқсанда банктер ірі бизнес тарапынан сұраныстың артып, ипотекалық несиеге қызығушылықтың қайта өседі деп болжауда.
Еуразия24 пікірі:
Ұлттық банк ірі бизнеске несие беруге арналған өтінімдердің артқанын тіркеп отыр. Бұл банк секторының тұтынушылық несиелендіруден нақты экономика бағытына қарай біртіндеп бет бұра бастағанын көрсетсе керек. Соңғы жылдары Ақорда да, Үкімет те банктердің өте қолайлы үлгіде жұмыс істеп келгенін бірнеше рет атап өткен болатын. Олар өндіріске, инфрақұрылымға немесе өңдеу өнеркәсібіне инвестиция құюды тәуекелі жоғары әрі табысы аз сала санап, халыққа жылдам, жаппай және жоғары пайдамен несие үлестіруді жөн көрді. Алайда қазіргі уақытта нарықта мүлдем басқа жағдай қалыптасуда: ипотека мен автонесие көрсеткіштері төмендеп, халықтың несиеге деген сұранысы бәсеңсіп келеді. Оның есесіне ірі бизнес өкілдерінен түсетін өтінімдер саны артып, тіпті орташа сұраныс көлемі 80 пайызға, яғни дерлік 19 миллиард теңгеге дейін күрт өскен. Бұл үрдіс бөліп төлеуге алынатын кезекті смартфон емес, ауқымды инвестициялық жобалардың қолға алына бастағанынан хабар береді. Мұндай ірі өтінімдерді мақұлдау деңгейінің төмендеуін теріс құбылыс деп қабылдауға болмайды. Керісінше, банктер несие қоржынын жасанды түрде өсіруді доғарып, жобалардың сапасына нақты мән бере бастағанын аңғартады. Ұзақ мерзім тұрғысынан алғанда бұл үдерістің экономика үшін тиімділігі жоғары.
